Zozafati m’ɔ ti Zida famiɛn’n bubuli Baali i sɔwlɛ mun, ɔ nin amuin mun Zide mɛn’n nun. Ɔ kunndɛ kɛ sran mun be si Zoova i mmla’n. I sɔ’n ti’n ɔ sunmannin Levifuɛ mun, ɔ nin Izraɛli kpɛnngbɛn mun Zida nvle wunmuan’n nun naan be kle sran mun Zoova i mmla’n.

Nvle nga be mantan Zide’n, b’a faman alɛ b’a wlaman be sin, afin be si kɛ Zoova o be sin. I kpa bɔbɔ’n, be cɛli Famiɛn Zozafati i ninnge wie mun. Sanngɛ Moabufuɛ mun nin Amɔnfuɛ mun, ɔ nin be nga be fin Sei mɛn’n nun lɔ’n, be bali kɛ be nin Zidafuɛ mun bé kún. Zozafati si kɛ ɔ fata kɛ Zoova ukɛ i. Ɔ yoli maan Izraɛlifuɛ mun be kwlakwla, i bla-o, i yasua-o, i bakan-o, be yiali Zerizalɛmun lɛ. Kpɛkun ɔ srɛli Zoova. Ɔ seli kɛ: ‘Zoova, wɔ yɛ a kwla de e-ɔ. Yaci, kle e like ng’ɔ fata kɛ e yo’n.’

Zoova tɛli i srɛlɛ sɔ’n su. Ɔ seli kɛ: ‘Nán srɛ kun amun. Ń má úka amun. Amun ko jranjran, nán amun tu amun bo, amún wá wún wafa nga ń má dé amun’n.’ ?Wafa sɛ yɛ Zoova deli be-ɔ?

Kɛ aliɛ cɛnnin cɛ’n, Zozafati kpali jue tofuɛ wie mun, kpɛkun ɔ seli be kɛ maan be dun sonja mun be ɲrun mmua. Be nantili Zerizalɛmun lele be juli alɛ kunwlɛ’n nun lɔ. Be flɛ lika sɔ’n kɛ Tekoa.

Kɛ jue tofuɛ mun bé tó jue bé mánmán Zoova aklunjuɛ su’n, nn Zoova kún be ti alɛ. Moabufuɛ nin Amɔnfuɛ mun be nun sanngannin. Ɔ maan be kunnin be wiengu. Be nun kun sa w’a kaman. Sanngɛ Zoova sasali Zidafuɛ mun nin be sonja mun, ɔ nin Ɲanmiɛn ɲrun jranfuɛ mun. Nvle nga be mantan Zida mɛn’n be tili sa nga Zoova yoli’n. Ɔ maan be wunnin i wlɛ kɛ Zoova te sɛsɛ i sran mun. ?Wafa sɛ yɛ Zoova de i sran mun-ɔn? Ɔ kwla yo sa fanunfanun. Ɔ mianman sran wun naan w’a de i sufuɛ mun.