Rinaot kan hadi kan Juda na si Jehosafat an mga altar ni Baal asin an mga diyos-diyosan sa lugar ninda. Gusto ni Jehosafat na maaraman kan mga tawo an mga katugunan ni Jehova. Kaya nagsugo siya nin mga prinsipe saka mga Levita sa bilog na Juda para itukdo sa mga tawo an mga katugunan ni Jehova.

Natakot an mga kaharaning nasyon na sumalakay sa Juda dahil aram nindang tinatabangan ni Jehova an saiyang banwaan. Nagdara pa ngani sinda nin mga regalo ki Hading Jehosafat. Pero nagsururog an mga Moabita, mga Ammonita, saka an mga hali sa rehiyon nin Seir laban sa Juda. Aram ni Jehosafat na kaipuhan niya an tabang ni Jehova. Ipinaapod niya sa Jerusalem an bilog na banwaan. Sa atubangan ninda gabos, namibi siya: ‘Jehova, kun mayo an tabang mo, dai po kami manggagana. Sabihon mo po samo kun ano an gigibuhon mi.’

Sinimbag ni Jehova an pamibi: ‘Dai kamo matakot. Tatabangan ko kamo. Diyan lang kamo sa puwesto nindo, dai kamo maghiro, asin hilingon nindo an pagliligtas ko.’ Paano sinda ilinigtas ni Jehova?

Kinaagahan, nagpili si Jehosafat nin mga parakanta asin sinabihan sinda na magmartsa sa inutan kan hukbo. Nagmartsa sinda puon sa Jerusalem sagkod sa lugar nin ralaban na inaapod na Tekoa.

Mantang maugmang inuumaw si Jehova kan mga parakanta sa makusog na boses, nakipaglaban si Jehova para sa saiyang banwaan. Rinibong ni Jehova an mga Ammonita saka Moabita kaya sinda-sinda an naggaradanan. Warang natadang buhay sainda. Pero prinoteksiyunan ni Jehova an mga taga Juda, an mga suldados, asin an mga saserdote. Nabaretaan kan mga tawo sa kaharaning mga nasyon an ginibo ni Jehova, asin naaraman ninda na sinusurog pa man giraray ni Jehova an saiyang banwaan. Paano iliniligtas ni Jehova an saiyang banwaan? Dakul siyang paagi. Dai niya kaipuhan an tabang nin mga tawo para iligtas an saiyang banwaan.