Jehosafat we i king blong Juda, i spolem ol olta blong Bal mo ol aedol. Hem i wantem we ol man oli save ol loa blong Jehova. Ale, hem i sanem ol haeman mo ol Livaet oli go long olgeta ples long Juda, blong oli tijim ol man long ol loa blong Jehova.

Long ol kantri raonabaot, ol man oli fraet blong kam mekem faet long Juda, from we oli save se Jehova i stap wetem ol man blong hem. Ale, oli karem ol presen i kam long King Jehosafat. Be ol man Moab, wetem ol man Amon mo ol man Edom, oli girap oli kam faet agensem Juda. Jehosafat i save se oli no save winim olgeta long prapa paoa blong olgeta, be oli nidim Jehova. Taswe, hem i singaot ol man, ol woman, mo ol pikinini oli kam long Jerusalem, mo hem i prea long fored blong olgeta se: ‘Jehova, mifala i nidim yu blong yu givhan long mifala, sipos no, bae mifala i lus. Plis yu talem long mifala se mifala i mas mekem wanem.’

Jehova i ansa se: ‘Yufala i no fraet. Bae mi givhan long yufala. Yufala i stanap rere, yufala i wet, mo bae yufala i luk we mi mi sevem yufala.’ ?Jehova i mekem wanem blong sevem olgeta?

Long nekis moning, Jehosafat i jusumaot ol man blong singsing, mo i talem long olgeta se bambae oli maj i go fastaem long ol ami. Ale, oli aot long Jerusalem, oli maj i go kasem ples blong faet long Tekoa.

Taem oli singsing wetem bigfala voes blong presem Jehova, long semtaem Jehova i faet agensem ol enemi blong olgeta. Hem i mekem se tingting blong ol man Amon mo ol man Moab i fasfas, nao oli kilkilim olgeta gogo evriwan oli ded. Be Jehova i lukaot gud long ol man Juda, ol soldia, mo ol pris. Ol man blong olgeta kantri raonabaot oli harem nius blong samting ya we Jehova i mekem. Nao oli save se Jehova bambae i gohed blong lukaot gud long ol man blong hem. ?Jehova i save mekem wanem blong sevem ol man blong hem? Hem i save mekem plante samting. Hem i no nidim ol man blong oli givhan long hem.