Raja i bas Juda eme Josapat. Iperperkenna kerina ingan-ingan nembah Baal. Merhat kel ia gelah kerina kalak meteh hukum Jahwe. Emaka isuruhna peminpin-peminpin ras kalak Lewi lawes ku sebelang Juda gelah ngajarken hukum Jahwe.

Kerina bangsa si ndeher ku kuta Juda mbiar nerang kuta e, perban ietehna kalak e ilindungi Jahwe. Ibereken kalak e ka hadiah man Raja Josapat. Tapi kalak Moap, kalak Amon, ras kalak Seir ersada guna nerang kuta Juda. Ieteh Josapat maka ia perlu penampat Jahwe. Ipepulungna dilaki, diberu, ras anak-anak i Jerusalem. Ertoto Josapat ilebe-lebe kalak e nina, ‘Jahwe, adi la isampatiNdu, labo kami banci menang. Katakenlah kai si arus ilakoken kami.’

Nina Jahwe, ‘Ula kam mbiar. Kusampati nge kam. Tetap kam tenang ras idahndu me uga Aku nelamatken kam.’ Uga cara Jahwe nelamatken kalak e?

Pepaginna, ipilih Josapat kalak si beluh rende janah isuruhna kalak e erbaris i lebe-lebe tenterana. Erdalan me kalak e i Jerusalem guna erperang i ingan si gelarna Tekoa.

Sanga kalak si beluh rende e ersurak alu meriah ukur guna muji Jahwe, erperang me Jahwe guna kalak e. Iban Jahwe kalak Amon ras kalak Moap lanai siangkan, janah kalak e pe sibunuh-bunuhen sada ras si debanna, dungna mate kerina. Tapi ilindungi Jahwe kalak Juda, tentera-tentera, ras imam-imam si lit i je. Kerina kalak si tading i deher kuta e megi kerna kai si ilakoken Jahwe, janah ieteh kalak e me maka isampati Jahwe nge umatNa. Kai saja si ilakoken Jahwe guna nelamatken umatNa? Melala kel carana. Labo Ia perlu penampat arah manusia.