Günringua lumuti Hosafátü, le lurúeite Hudá, lani Baali latarü hama guáriua ha ñéinbaña. Busenti meha hasubudiruni gürigia lilurudun Heowá. Ligía lóunahanbei gumadan hama lewitagu lidoun sun fulasu Hudá lun harufudahani lilurudun Heowá houn gürigia.

Kei meha subudi habalin lílana burí néchani le yarafabei lun Hudá anihein lan Heowá hama lumutuniña, hanufudetiña meha hábürühan hawagun. Añahein hádangiñe barütiña idewesei lun urúei Hosafátü. Ánhañati moábüna, amonna hama lílana luwübüri Seirü, ñǘdüntiña ageindagua hama lílana Hudá. Subudi lumuti meha Hosafátü megei lani lídehan Heowá. Ligía lóundaragunbaliña sun wügüriña, würiña hama irahüñü Herusalén. Ábati lafurieidun lun Heowá hagibugiñe súngubei, lariñaga: “Heowá, siñabei wagañeirun ánhawa míderagun ban. Ariñagabéi woun kaba lan wadüga”.

Aba lóunabuni Heowá: “Manufudedabá. Níderagubadibu. Aranse humá, deregüdagua huguyame, harihubei ida luba lan nesefurunün”. Ida lubati buga lesefuruniña Heowá?

Larugan binaafin, aba lanúadirun Hosafátü eremuhatiña, ariñaga ligía houn lun houdin habá habá súdaragu. Aba háfuridun Herusaléngiñe lun houdin ageindagua lidan aban fulasu gíriti Tekóa.

Eremuhatiña lau ugundani lun halawahani Heowá lau umalali héreti. Ageindaguati Heowá hawagu lumutuniña. Adügati lun hageindagun amonna hama moábüna hámagua ani úati ni aban hádangiñe erederuti wínwanñu. Góunigi lumutiña Heowá lílana Hudá, súdaragu hama fádirigu. Aganbatiña sun lílana burí fulasu le yarafabei luagu le ladügübei Heowá, ábati hasubudiruni ageindagua lan Heowá hawagu lumutuniña. Ida liña lesefuruniña Heowá lumutuniña? Lidan saragu igaburi ani memegeirun lumuti Heowá hídehan gürigia.