Yehosofate, mwanangana wa Yunda, kanongesele yilumbilo ya Mbale ni tuponya eswe mu chifuchi. Iye kazangile hanga atu anyingike shimbi ja Yehova. Kashika atumine yilolo ni A-Levi mu Yunda mweswe hanga alongese atu shimbi ja Yehova.

Mavungu waze te asulangana ni A-Yunda yevwa woma wa kulimika no, mumu kanyingikine ngwo, Yehova kali hamwe ni atu jenyi. Ayo yahana milambu kuli Mwanangana Yehosofate. Alioze A-Moape, A-Amone ni akwa-mbonge ya Sere yeza ni kwasa jita ni A-Yunda. Yehosofate yanyingika ngwenyi te kanafupiwa ukwaso wa Yehova. Chocho, yakungulula atu eswe malunga, mapwo ni ana mu Yerusaleme. Kulutwe lia ayo eswe, iye yalemba ngwenyi: ‘Yehova, nyi kuushi hamwe ni yetu, kutushi kuhasa kukumba. Lisesa tulweze kama yize mutulinga.’

Yehova yakumbulula kulemba chacho hakwamba ngwenyi: ‘Kanda nwivwa woma. Mungunukwasa. Liluliekenu, twaminyinenu, hanga nutale chize mungunulamwina.’ Kuchi Yehova aalamwinyine?

Mukwachako, Yehosofate yalulieka akwa-kwimba miaso ni kwaalweza hanga apalike kulutwe lia maswalale. Ayo yatetekela kukatuka ku Yerusaleme ndo ku Tekoa kuze te mashila jita.

Muze te ngimba anahalisa Yehova ni chiseke cheswe ni maliji mwilu, chocho Yehova yapulwila atu jenyi ku jita. Iye yavundanganyisa A-Amone ni A-Moape, ayo yaputuka kulishiha umwe ni mukwo, chocho eswe yafwa. Alioze Yehova yalamwina A-Yunda, maswalale ni asasandote. Atu eswe waze te asulangana ni A-Yunda yevwa yuma yize Yehova alingile, nawa yanyingika ngwo Yehova te kali hamwe ni atu jenyi. Kuchi Yehova alamwinyine atu jenyi? Mu mitapu yinji. Iye keshi kufupa ukwaso wa atu mba achilinge.