Zuda masacɛ Zozafati ye Baali ka sarakabɔlanw ani joow halaki ka bɔ Zuda mara kɔnɔ. A tun b’a fɛ mɔgɔw ka Jehova ka sariyaw lɔn. O kama, a ye kuntigiw ni Levitew ci ka taga Zuda mara bɛɛ la walisa ka mɔgɔw kalan Jehova ka sariyaw la.

Zuda mara gɛrɛfɛ mɔgɔw tun be siran ka Zuda mara kɛlɛ sabu u b’a lɔn ko Jehova be ni a ka mɔgɔw ye. U yɛrɛ nana kadow di masacɛ Zozafati ma. Nka Mowabukaw, Amoniw ani minw tun be Seyiri mara la, olu nana Zuda kɛlɛ. Zozafati tun b’a lɔn ko a mako be Jehova ka dɛmɛ na. A ye cɛɛw, musow ani denmisɛnw bɛɛ lajɛn Zeruzalɛmu. A ye delili kɛ u bɛɛ ɲɛɛ na ko: ‘Jehova, ni ele sababu tɛ, an tɛ se ka see sɔrɔ. Sabari, a fɔ an ye an ka ɲi ka min kɛ.’

Jehova y’o delili jaabi. A ko: ‘Aw kana siran. Ne bena aw dɛmɛ. A’ y’aw yɛrɛ labɛn, ka to yɔrɔ kelen ani a’ y’a filɛ ne bena aw kisi cogo min na.’ Jehova y’u kisi cogo di do?

O dugusagwɛ sɔgɔma, Zozafati ye dɔnkililabagaw sugandi ani a y’a fɔ u ye ko u ka bila kɛlɛkɛlaw ɲɛ. K’a ta Zeruzalɛmu, u tagamana fɔɔ ka taga se kɛlɛkɛyɔrɔ la, yɔrɔ min be weele ko Tekowa.

Ka dɔnkililabagaw to u be tandoli dɔnkili lara Jehova ye ni ninsɔndiya ani kaanba ye, Jehova ye kɛlɛ kɛ a ka mɔgɔw ye. A ye ɲagaminiba don Amoniw ni Mowabukaw cɛ fɔɔ u y’a daminɛ ka ɲɔgɔn kɛlɛ. U cɛma mɔgɔ si ma kisi. Nka Jehova ye Zuda mɔgɔw, sɔrɔdasiw ani sarakalasebagaw latanga. Jehova ye min kɛ, bɛɛ y’o mɛn Zuda gɛrɛfɛ duguw la ani u y’a lɔn ko Jehova bele b’a ka mɔgɔw lafasa. Jehova b’a ka mɔgɔw kisi cogo di? A b’o kɛ cogo caaman na. A mako tɛ adamadenw ka dɛmɛ na k’o kɛ.