Jehoshaphat emi ekedide edidem Judah ama owụri mme itieuwa Baal onyụn̄ osio mme nsunsu abasi efep ke Judah. Enye okoyom mme owo ẹdiọn̄ọ ibet Jehovah. Ntre enye ama osio mbọn̄ ye nditọ Levi ọdọn̄ ẹsan̄a ke ofụri Judah ẹkpep mme owo ibet Jehovah.

Ndịk ikayakke mme idụt emi ẹkedude ẹkpere mmọ ẹdi en̄wan ye mmọ sia mme idụt oro ẹma ẹdiọn̄ọ ke Jehovah odu ye ikọt esie. Mmọ ẹma ẹkam ẹmen ẹnọ ẹsọk Edidem Jehoshaphat. Edi nditọ Ammon, mbon Moab, ye mbon Seir ẹma ẹdi en̄wan ye Judah. Jehoshaphat ama ọdiọn̄ọ ke Jehovah kpọt ekeme ndin̄wam imọ. Enye ama anam kpukpru irenowo, iban, ye nditọwọn̄ ẹsop idem ke Jerusalem onyụn̄ ada ke iso mmọ ọbọn̄ akam ete: ‘Jehovah, edieke afo mûn̄wamke nnyịn, nnyịn idikanke ke ekọn̄ emi. Mbọk teme nnyịn se ikpanamde.’

Jehovah ama ọbọrọ akam esie, onyụn̄ ọdọhọ ete: ‘Kûkop ndịk. Nyan̄wam fi. Ẹdu ke itie mbufo, ẹtuak ẹda, ẹnyụn̄ ẹkụt nte ndinyan̄ade mbufo.’ Didie ke Jehovah akanyan̄a mmọ?

Edem usen oro, Jehoshaphat ama ọdọhọ mme ọkwọikwọ ete ẹsan̄a ke iso mbonekọn̄ ẹkwọ ikwọ. Mmọ ẹma ẹto Jerusalem ẹsan̄a ẹkesịm an̄waekọn̄ ke Tekoa.

Nte mmọ ẹkesụk ẹkwọde ikwọ ẹtoro Jehovah ke ọkpọsọn̄ uyo, Jehovah ama an̄wana ọnọ ikọt esie. Enye ama etịmede nditọ Ammon ye mbon Moab tutu mmọ ẹtọn̄ọ ndiwot idemmọ; owo mmọ ndomokiet ikọbọhọke. Edi Jehovah ama ekpeme mbon Judah, mbonekọn̄ mmọ, ye mme oku. Kpukpru mme idụt emi ẹkedude ẹkpere Israel ẹma ẹkop se Jehovah akanamde ẹnyụn̄ ẹdiọn̄ọ ke Jehovah osụk ododu ye ikọt esie. Didie ke Jehovah esin̄wam ikọt esie? Awawak usụn̄. Enye isiben̄eke owo ndomokiet odudu ida inam emi.