E vakarusa o Josafati na tui Juta na icabocabonisoro i Peali kei na matakau ena vanua qori. E vinakata mera kila na lawa i Jiova na lewenivanua. E mani talai ira na turaga kei ira na Livai e Juta taucoko mera vakavulica na lawa i Jiova.

Era rere na veivanua voleka nira kila ni tokoni ira nona tamata o Jiova, ya na vuna era sega ni valuti ira kina. Era kau iloloma mada ga vei Tui Josafati. Ia era lai valuti Juta o ira na Moapi, na Amoni, kei ira mai na vanua o Sia. E kila o Josafati ni bibi me nuitaka na veivuke i Jiova. E kacivi ira kece na tagane, yalewa, kei na gone mera lako yani i Jerusalemi. E duri e matadra qai masuta: ‘I Jiova, keimami na druka ke oni sega ni tokoni keimami. Yalovinaka, tukuna mai na ka me keimami cakava.’

E sauma o Jiova na masu qori: ‘Ni kua ni rere. Au na vukei kemuni. Ni vakarau, ni tu vakadua, moni raica niu vakabulai kemuni.’ E qai vakabulai ira vakacava o Jiova?

Ena mataka tarava, e digitaki ira na daulagasere o Josafati qai tukuna mera liu vei ira na sotia. Era biuti Jerusalemi mera lako ina rara ni vala e Tikoa.

Nira marautaka tiko na daulagasere na nodra vakacaucautaki Jiova ena domoilevu, e qai vala o Jiova ena vukudra na nona tamata. E vakavuna mera veilecayaki na Amoni kei ira na Moapi, era mani veivakamatei ga vakataki ira, e sega tale ni dua e vo. Ia o Jiova e taqomaki ira na lewe i Juta, nodra sotia, kei ira na bete. Nira rogoca qori na veimatanitu voleka, era kila ni se taqomaki ira tiko ga na nona tamata o Jiova. E dau vakabulai ira ena levu na sala, e sega ni vakararavi vua e dua.