De Josaphat, de König vo Juda, macht im ganze Land d Altär und Götzebilder vom Baal kaputt. Ihm isch es wichtig, dass s Volk d Gsetz vo Jehova verstaht. Drum schickt er Levite und Männer, wo d Füehrig hend, los, um de Mensche i ganz Juda d Gsetz vo Jehova z lehre.

D Nachbervölker hend Angscht, Juda azgriife, wil si wüssed, dass Jehova sim Volk hilft. Si bringed em Josaphat sogar Gschenk. Aber nachher chömmed d Moabiter, d Ammoniter und d Männer us de Gegend vo Seir und wend gege Juda kämpfe. De Josaphat weiss, dass er d Hilf vo Jehova brucht. Er seit, dass alli Männer, Fraue und Chind uf Jerusalem sölled cho. Denn staht er vor si here und betet: «O Jehova, ohni dich chönnd mir nid gwünne. Bitte säg üs, was mir sölled mache.»

Jehova seit als Antwort uf das Gebet: «Ihr müend kei Angscht ha, ich wirde euch helfe. Stöhnd here, bliibed stah und lueged, wie ich euch rette.» Weisch du, wie Jehova si rettet?

Am nöchschte Morge wählt de Josaphat Sänger us, wo vor de Soldate sölled laufe. Und denn laufed alli vo Jerusalem us i d Wüeschti vo Tekoa, wil dört wird denn de Kampf sii.

Währenddem, dass d Sänger luut und mit vil Freud Loblieder singed, kämpft Jehova für sis Volk. Er macht, dass d Ammoniter und d Moabiter eso durenand sind, dass si sich gegesiitig töted. Kei Einzige vo ihne überlebt. Aber d Männer vo Juda, d Soldate und d Prieschter tuet Jehova beschütze. Alli Nachbervölker vo Juda ghöred, was Jehova gmacht het und drum wüssed si, dass er immer no für sis Volk kämpft. Jehova het vil Möglichkeite, sis Volk z rette. Und er brucht für das kei Hilf vo Mensche.