Jehosafat nia wanee wayuu aluwataapuʼushi saaʼu Judá, najaʼttiraka tü aʼwaajüleekat Baal otta tü maleiwayaasükalüirua. Keeʼireesü naaʼin Jehosafat sütüjaanüin aaʼu tü nuluwataakalü anain Jeʼwaa. Müshiijeseʼe nuluwataain na niʼipajanakana otta na leviitakana süpüla nekirajüinjanain na wayuukana süchiki tü nuluwataakalü anain Jeʼwaa.

Nnojoishii ashutuin naaʼu na wayuu pejekana nanain süka natüjaain saaʼu eein Jeʼwaa namaa na israeliitakana otta mmotshii naya seema tü nüpülainkat. Eejana na asülajakana kasa nümüin Jehosafat. Soʼu wanee kaʼi, na moabiitakana, na ammoniitakana otta waneinnua wayuu chajanaka suluʼu tü mmakat Seír, paaʼinwashii naya shikiira nashutuin saaʼu Judá. Nütüjaa aaʼu Jehosafat niainjachin Jeʼwaa chi akaaliinjakai nia. Nuutkajeʼeraka napüshuaʼa na wayuukana chaa Jerusalén, eejana tooloyuu, jieyuu otta tepichi. Nuchuntaka Jehosafat nümüin Jeʼwaa noʼupala. «Jeʼwaa nnojoishii süpüla wakanajüin na waʼünüükana nnojoire eein pia wamaa. Püküja wamüin tü waaʼinrüinjatkat», nümaka.

Naapüin Jeʼwaa nünüiki Jehosafat otta asoutushi niʼipajee: «Nnojo mmoluin jia, tayeechi akaaliinjaka jia. Juʼuna sünain tü atkawaakat, jimata neʼe jia jiʼreetka tü taaʼinrüinjatkat süpüla toʼtteʼerüin jia». ¿Kasache naaʼinrüinjatka Jeʼwaa süpüla nuʼtteʼerüin naya?

Waneemüin kaʼi, nüneeküin Jehosafat eeʼirajülii otta nuluwataain naya palajana napüleerua na surulaatkana. Ojuʼitüshii naya Jerusalénjee süpüla nantiraainjanain namaa na naʼünüükana suluʼu wanee mma Tecoa münüsü.

Talatüshii maʼin na eeʼirajüliikana sümaa neeʼirajüin süka süpüshuaʼa naaʼin nümüin Jeʼwaa. Nia Jeʼwaa atkaaka süpüleerua nupueulose. Nütkeʼerüin Jeʼwaa na naʼünüükana. Outushii naya napüshuaʼa. Akanasaʼa na wayuu chejeʼewaliikana Judá, na sacerdootekana otta na eeʼirajüliikana nnojoishii naya jamajüin süka naaʼinmajüin naya Jeʼwaa. Napüshuaʼa na kepiakana pejepünaa nanain, naapüin süchiki tü kasa naaʼinrakat Jeʼwaa. Nayaawata aaʼu ayatüin naaʼinmajüin Jeʼwaa tü nupueulosekat noulia na naʼünüükana. ¿Kasa naaʼinraka Jeʼwaa süpüla nuʼtteʼerüinjatüin nupueulose? Watta saalii sukuwaʼipa nutuma Jeʼwaa, nnojotsü choʼujaain nuchuntuin kaaliinwaa sümüin wayuu.