Jehosafat ye namani reire kä Judá yekänti, niara kä jondron kukwakäre ngöbö ngwarbe Baal ie aune jondron ngwarbe keta kabre üai sribebare ngöböre ye juani ngwarbe kwe. Jehovakwe kukwe keta kabre biani nuaindre ye rabadre gare nitre ie yei niara tö namani. Ye medenbätä, nitre ütiäte kri aune nitre levita ye juani kwe kä jökrä judá yekänti ne kwe niaratre rabadre kukwe keta kabre biani nuaindre Jehovakwe ye driere juta yei.

Juta mada mada nämene nüne Judá bäre yebätä kä jürä nämene ja mikakäre rüere, ñobätä ñan aune Jehová nämene juta kwe ye dimike. Yebätä nitre ye nämene niken jondron ngwena rei Jehosafat ie. Akwa, ye ngwane nitre Ammón, Moab aune nitre mada mada nünanka kä Seir ye nikani rüre nitre Judá yebe. Jehosafat ie nämene gare Jehová rabadre niara dimike. Aisete nitre brare, merire aune monsotre kia ye ükaninkrö jökrä kwe Jerusalén. Nitre ye jökrä ngwärekri niara orabare: ‘Jehová, nun ñaka raba rü ganainne kaibe. Nunkwe dre nuaindre ye mä raba mike gare nunye’.

Jehovakwe Jehosafat kukwe nuani aune kukwei kani ngäbiti kwe: ‘Mun ñan kä jürä ngwan jabätä, tikwe mun dimikai. Mun nän ja täte, mun raba kwekebe aune tikwe mun mikai kwäre ño ye mun raba mike ñärärä’. ¿Jehovakwe niaratre mikani kwäre ño?

Jetebe se kwrere, Jehosafat nitre kantaka ükaninkrö aune niaratre rabadre niken nitre rükä ye bäre ta niebare kwe ietre. Niaratre nämene Jerusalén nikani kä kiare rükäre kädeka nämene Tecoa yekänti.

Nitre kantaka ye kantabare kä jutobiti aune ja dibiti Jehovai. Angwane, Jehová nämene rüre juta kwe ye dokwäre. Nitre ammonita aune moabita ye töi kwitani kwe aune niaratre namani rüre jabe kwärikwäri. Niaratre ye jökrä murie ketani. Akwa Jehovakwe nitre Judá, nitre rükä aune nitre sacerdote ye kriemikani. Jehovakwe dre nuainbare ye namani gare juta mada mada yei aune Jehová nämene jankunu juta kwe dimike rüe yebätä ye nükani gare ietre. ¿Jehovakwe juta kwe mikani kwäre ño? Nuainbare kwe bätäkä ngwarbe. Ni kä nebätä käkwe niara dimikadre ye ñaka ribere jai.