Ombara yaJuda, Josafat, ya nyona ovipunguhiro vyaBaal noviserekarera mehi. Eye aa vanga kutja ovandu ve tjiwe omatwako waJehova. Okutja otja hinda ovahongore nOvalevi moJuda atjihe kutja ve honge ovandu omatwako waJehova.

Oviwaṋa vyopopezu aavi tira okuverwisa orondu aave tjiwa kutja Jehova u ri puna wo. Owo nandarire va etera Ombara Josafat oviyandjewa. Posiya Ovamoab, Ovaamoni, na imba mba za korukondwa rwaSeir ve ya okuyekurwisa Ovajuda. Josafat aa tjiwa kutja ma hepa ombatero okuza ku Jehova. Eye wa raera ovarumendu avehe, ovakazendu novanatje avehe okuyekuworongana pamwe moJerusalem. Eye wa kumba ku Jehova momurungu wawo avehe na tja: ‘Jehova, nokuhina ove kamaatu taara. Arikana tu raera kutja ngatu tjite vi.’

Jehova wa zuvira ongumbiro yawo na tja: ‘Amu tira Ami me mu vatere. Kurameye potuveze tweṋu nu undjeye, nu mu tare tji me mu yama.’ Jehova we ve yama momuano uṋe?

Omuhuka imbwi owarwe, Josafat wa toorora ovaimbure ne ve raere kutja ngave nḓerere komurungu wotjimbumba tjovita. Owo va nḓerera okuza moJerusalem nga morutjandja rwovita ndu isanewa Tekoa.

Otja ovaimbure tjaave tanga Jehova nokuimbura tjinene nondjoroka, Jehova wa rwira otjiwaṋa tje. Eye wa tjita kutja Ovaamoni nOvamoab ve pambauke nowo va uta okurwisasana nu kapena umwe wawo ngwa hupa. Posiya Jehova wa yama ovature vaJuda, ovarwe wovita, novapristeri. Ovandu avehe momahi wopopezu va zuva ohunga na imbi Jehova mbya tjita, nu owo aave tjiwa kutja ngunda Jehova u rwira otjiwaṋa tje. Omomiano viṋe Jehova me yama ovakarere ve? Omomihingo omingi. Eye kahepa ombatero yovandu okutjita nao.