Jehoshafat ovie Juda o kporo egbada-idhe Ebale gbe emedhọ nọ e jọ otọ na kpobi no. Ọ gwọlọ nọ ahwo na kpobi a riẹ izi Jihova. Fikiere o te vi emọ-ivie gbe ahwo Livai nyai wuhrẹ ahwo Juda kpobi izi Jihova.

Ozọ u je mu erẹwho nọ e kẹle rai gaga re a wọ ẹmo bru ahwo Juda ze, keme a riẹ nọ Jihova Ọghẹnẹ rai ọ rrọ kugbe ai. Erẹwho na a jẹ tubẹ rehọ ekẹ se Jehoshafat ovie na dede. Rekọ ahwo Moab, ahwo Ammọn, gbe ahwo ewho nọ e rrọ ubrotọ Seia a tẹ wọ ẹmo bru ahwo Juda ze. Jehoshafat ọ riẹ nọ ọ gwọlọ obufihọ Jihova. O te koko ezae, eyae, gbe emaha na kpobi ziọ obọ Jerusalẹm. Evaọ iraro ahwo na kpobi, ọ tẹ lẹ se Jihova nọ: ‘Ababọ ra Jihova, ma sai fi kpaobọ họ. Ivie vuẹ omai oware nọ ma re ru.’

Jihova ọ tẹ kuyo olẹ na inọ: ‘Ozọ u mu owhai hi. Me ti fiobọhọ kẹ owhai. Wha dikihẹ ẹta rai, wha mudhe oria ovo, wha te ruẹ oghẹrẹ nọ me ti ro siwi owhai.’ Kọ oghẹrẹ vẹ Jihova o ro siwi ai?

Nọ oke o ke, Jehoshafat ọ tẹ salọ ahwo nọ a rẹ suile, ọ tẹ ta kẹ ai nọ a kobaro kẹ egbaẹmo riẹ. A tẹ rọ owotọ nya no Jerusalẹm rite oria nọ a ti jo fi ẹmo na nọ a re se Tẹkoa.

Nọ ahwo na a be rọ evawere suile jiri Jihova na, Jihova ọ tẹ họre kẹ ai. Jihova o ru nọ ahwo Ammọn gbe ahwo Moab a jẹ rọ họre ohwohwo, aikpobi a te whu. Rekọ Jihova ọ thọ ahwo Juda kpobi, te isoja na gbe izerẹ na. Ahwo erẹwho nọ e kẹle rai kpobi a yo kpahe oware nọ Jihova o ru, a tẹ riẹ nọ Jihova ọ be thọ ahwo riẹ. Oghẹrẹ vẹ Jihova ọ rẹ rọ thọ ahwo riẹ? Ọ rẹ rọ oghẹrẹ sa-sa thọ ahwo riẹ, yọ ọ gwọlọ obufihọ ohwo ọvo ho.