Jiozafá éra rei di Judá. El distrui tudu altaris ku imajis di Baal ki tinha na se reinu. El kria pa povu konxeba leis di Jeová. Pur isu, el manda prínsipis ku levitas pa tudu téra di Judá pa bai inxina povu leis di Jeová.

Kes nason ki ta fikaba pértu di Judá, fika ku medu di ataka-l pamodi es sabia ma Jeová staba ku se povu. Ti es fika ta manda prezentis pa Jiozafá. Má dipôs moabitas, amunitas i kes ki éra di zóna di Seir bai luta ku Judá. Jiozafá sabia ma el mesteba di ajuda di Jeová. El manda djunta tudu ómis, mudjeris ku mininus na Jiruzalen. El ora na frenti di tudu es i el fla: ‘Jeová, sen bu ajuda nu ka ta ganha. Favor fla-nu kuzê ki nu ta faze.’

Jeová responde: ‘Ka nhos xinti medu. N ta djuda nhos. Nhos toma nhos puzison, nhos fika paradu i nhos odja modi ki N ta salva nhos.’ Modi ki Jeová salva-s?

Kel otu dia di sédu, Jiozafá skodje kantoris i el fla-s pa es anda dianti di trópas. Es anda di Jiruzalen ti kanpu di géra ki ta fikaba na un lugar ki txomaba Tekoa.

Timenti kantoris ta lovaba Jeová ku vós altu i ku alegria, Jeová luta pa se povu. El poi amunitas ku muabitas na konfuzon, nton es kumesa ta ataka kunpanheru i ninhun di es ka fika bibu. Má Jeová proteje se povu, trópas i saserdótis di Judá. Tudu kes otu povu ki ta moraba pértu obi kuzê ki Jeová faze i es sabia ma inda El staba ta difende se povu. Modi ki Jeová salva se povu? Di un monti manera. El ka meste ómis pa djuda-l.