Yehoshafati, ntotila ya Yuda, fwaka bamesa-kimenga mpi biteki ya Baale na insi na yandi. Yandi vandaka kuzola nde bantu kuzaba bansiku ya Yehowa. Yo yina, yandi tindaka bamfumu ti Balevi na Yuda ya mvimba sambu na kulonga bantu bansiku ya Yehowa.

Makanda yina vandaka na nziunga na bo vandaka kuwa boma ya kunwanisa Yuda sambu bo vandaka kuzaba nde Yehowa kele ti bantu na yandi. Nkutu bo vandaka kunatila ntotila Yehoshafati makabu. Kansi na nima, bantu ya Moabi, ya Amoni, mpi ya Seire kwisaka kunwanisa Yuda. Yehoshafati zabaka nde yandi vandaka ti mfunu ya lusadisu ya Yehowa. Yandi vukisaka babakala yonso, bankento yonso, ti bana yonso na Yeruzalemi. Na ntwala na bo yonso, yandi sambaka nde: ‘Yehowa, beto lenda nunga ve kukonda lusadisu na nge. Pardo songa beto mambu ya beto fwete sala.’

Yehowa pesaka bo mvutu yai na kisambu na bo: ‘Beno wa boma ve. Mono ta sadisa beno. Beno telama pana, beno nikana ve, mpi beno mona mutindu mono ta gulusa beno.’ Inki mutindu Yehowa gulusaka bo?

Na suka yina landaka, Yehoshafati ponaka bayimbi mpi songaka bo na kutambula na ntwala ya basoda. Bo tambulaka katuka na Yeruzalemi tii na kisika ya kunwana bitumba, zina na yo Tekoa.

Ntangu bayimbi vandaka kukumisa Yehowa na kiese yonso na ndinga ya ngolo, Yehowa nwanaka sambu na bantu na yandi. Yandi kotisaka mavwanga na kati ya bantu ya Amoni mpi ya Moabi ebuna bo yantikaka kunwana bo na bo, mpi ata muntu mosi ve bikalaka na luzingu. Kansi Yehowa taninaka bantu ya Yuda, basoda, mpi banganga-nzambi. Bantu yonso ya makanda ya nziunga waka nsangu ya mambu yina Yehowa salaka, mpi bo zabaka nde Yehowa vandaka kunwanina bantu na yandi. Inki mutindu Yehowa ke gulusaka bantu na yandi? Yandi ke salaka yo na mitindu mingi. Yandi kele ve ti mfunu ya bantu sambu na kusala yo.