Yehoshafwata wajinga mfumu wa bena Yuda wakundawile bya kusokelapo bitapisho bya kwa Baela ne bankishi bajinga mu kyalo. Wakebelenga bantu kuyuka mizhilo ya Yehoba. Onkao mambo, watumine babineme ne bena Levi mu Yuda kuya na kufunjisha bantu mizhilo ya Yehoba.

Bisaka bya bantu bibazhokolokele byachiinanga kulukuka bena Yuda, mambo bayukile’mba Yehoba wazhikijilanga banji. Baletelenga bya bupe Mfumu Yehoshafwata. Bino bena Moabu, bena Amonyi ne baikelenga ku mpunzha ya Seila baishile na kulwa na bena Yuda. Yehoshafwata wayukile’mba wakonsha kwibashinda inge Yehoba wamukwasha. Wakonkenye banabalume bonse, banabakazhi ne baana babo mu Yelusalema. Walombele ku meso a bano bantu bonse amba: ‘Yehoba kwa kubuula anweba, kafwako kyo twakonsha kuba ne. Twapopwela, tubuulai byo twafwainwa kuba.’

Yehoba wakumbwile lulombelo lwabo ne kwibambila’mba: ‘Kuchina ne. Nsakwimukwasha. Yainga, mwimanetu kishinshi, musakumona byo nsakwimuzhikijila.’ Yehoba wibazhikijile byepi?

Byo bwakile lukelo, Yehoshafwata wasajile banyimbi ne kwibambila kutangilako kulutwe, ne bashilikale saka bebalondela. Baendele kufuma ku Yelusalema kuya ku Tekoa kwaikejile nkondo.

Yehoba walwijileko bantu banji, banyimbi byo baimbilenga nyimbo ya kumutota Yehoba na lusekelo. Wavulañenye bena Amonyi ne bena Moabu ne kwibalengela kwialukilamo mulwabo, kabiji kafwakotu nangwa umo wapulukile ne. Bino Yehoba wazhikijile bena Yuda, bashilikale ne bañanga. Bantu bonse baikalanga kipi kipi baumvwine byaubile Yehoba, kabiji bayukile’mba Yehoba ubena kuzhikijila bantu banji. Yehoba upokolola byepi bantu banji? Wibapokolola mu mashinda apusana pusana. Kechi ukeba bantu ba bakumukwashako pa kuba bino ne.