Jɛoshafat we na bin di kiŋ na Juda, bin pwɛl pwɛl ɔl di lay lay gɔd dɛn ɛn Beal ɔlta dɛn we bin de na di land. I bin want mek di pipul dɛn sabi Jiova in lɔ dɛn. So i sɛn prins dɛn ɛn Livayt dɛn ɔlsay na Juda fɔ go tich di pipul dɛn Jiova in lɔ dɛn.

Ɔl di pipul dɛn we bin de nia Juda bin de fred fɔ go fɛt dɛn bikɔs dɛn no se Jiova de fɛt fɔ in pipul dɛn. Dɛn bin ivin kam wit gift dɛn fɔ Kiŋ Jɛoshafat. Bɔt di Moabayt dɛn, Amɔnayt dɛn, ɛn di pipul dɛn na Sia bin kam fɔ fɛt di pipul dɛn na Juda. Jɛoshafat bin no se i nid Jiova in ɛp. I bin mek ɔl di man, uman ɛn pikin dɛn kam na Jerusɛlɛm. Bifo dɛn ɔl, i pre se: ‘Jiova, wi nɔ go ebul fɔ win if yu nɔ de wit wi. Duya tɛl wi wetin fɔ du.’

Jiova ansa in prea bay we i tɛl am se: ‘Nɔ fred. A go ɛp yu. Una tinap na di say we una fɔ de, una tinap tranga wan, ɛn si aw a go sev una.’ Aw Jiova bin sev dɛn?

Di nɛks mɔnin, Jɛoshafat bin pik pipul dɛn we de siŋ ɛn tɛl dɛn fɔ mach bifo di sojaman dɛn. So dɛn bin mach frɔm Jerusɛlɛm te go na di say fɔ fɛt na wan ples we dɛn kɔl Tɛkoa.

So we di wan dɛn we bin de siŋ lawd wan wit gladi-at fɔ prez Jiova bin de siŋ, Jiova fɛt fɔ in pipul dɛn. I mek di Amɔnayt dɛn ɛn di Moabayt dɛn kɔnfyuz, so dɛn bigin fɔ fɛt dɛnsɛf ɛn dɛn ɔl day. Bɔt Jiova protɛkt di pipul dɛn na Juda, di sojaman dɛn, ɛn di prist dɛn. Ɔl di pipul dɛn we bin de na di kɔntri dɛn we bin de nia Juda yɛri bɔt wetin Jiova du, ɛn dɛn bin no se Jiova bin de stil fɛt fɔ in pipul dɛn. Aw Jiova kin sev in pipul dɛn? I kin du dat difrɛn we dɛn. I nɔ nid mɔtalman dɛn fɔ ɛp am fɔ du dat.