Chɛhosiafati wa masaa le Chuda ni. Nduyɛ maaŋnda ndaa taŋgul le Baal sooluuwo laŋ, mbo tɛɛmbuu laŋ kpou. Ndoo yeema mi waŋnda sina sawala Chɛhowa laŋ. Le hei, mbo yɔŋ laŋgbaa kalla a Livaiya o lɛŋnde Chuda leŋ niŋ kpou le waŋnda pɛɛkoo a sawala Chɛhowa laŋ okɔɔ.

Mi siooŋnde bii lɛŋii ndii balu Chuda ve le nda delɔɔ choo a sɔŋgɔɔ, kanifuule ndaa sina maa Chɛhowa wa a wanaa nduaa latulu. Ma chuu pɛŋ Masaa Chɛhosiafati nyɔɔŋ tau. Kɛ mi Mowabaitiiya, Amɔnaitiiya, a wanaa cheleŋ o tanda Siaa wo niŋ, huŋ le waŋnda Chuda chiŋalaŋndo a sɔŋgɔɔ. Chɛhosiafati ndoo sina maa o nɔ mbo tiindaŋ Chɛhowa le mbo mala ndu. Le hei, mbo chuuŋgiaa waŋ piaanduaa, waŋ laanduaa, a chuaambuaa kpou naapilɛ Chulusalɛm. Mbo sim nda kpou o hɔl mbo piɛi aa: ‘Chɛhowa, te o cho a mala numndo le, ŋ tiu waŋnda haa ba le. Yandii, chɔm naa nyɛ naŋ nɔ miŋ tosa wo.’

Mi Chɛhowa mulul ndu aa: ‘La yɔŋ isiooŋ te. I cho nya mala. La kɔ mi la kɔ sim yi, nduyɛ mi la che mɛɛ ya cho nya chiindiaa yɛ.’ Vɛɛ Chɛhowa ndoo chiindiaa yɛ nda?

Diimandɔɔ, mi Chɛhosiafati hɛli wanaa ŋchonduaa, mbo dimul nda le ma sim puaa chɔuwa lachi. Ma chaŋ Chulusalɛm ma kua haaa Tɛkowa, o fondaŋ nda wa kɔlaŋ chɔuwo wo.

Wanaa ŋchonduaa haa wa Chɛhowa saŋgalaa choo choo o chondoŋ niŋ, mi Chɛhowa ndu wa sɔŋgɔɔ le wanaa nduaa. Mbo tosa mi Amɔnaitiiya a Mowabaitiiya laasiaŋ kɔltaŋ. Okoŋ, ma mululaŋ ndapila a sɔŋgɔɔ. Nduyɛ wana pilɛ bɛɛ lo yoomu le. Kɛ mi Chɛhowa manda waŋnda Chuda, puaa chɔuwa, vɛlɛ a wanaa soliaa lasalaa. Mi wanaa wa o lɛŋii balu nda ve niŋnda kpou tuɛi nyɛ Chɛhowa tosa wo. Nduyɛ ma sina kɛsɛ maa Chɛhowa cho wɔ wanaa nduaa malaa. Vɛɛ Chɛhowa piŋi yɛ wanaa nduaa? O tosa hei o nɛila bɔɔbɔɔ niŋ. Chɛhowa yeema mala waŋnda chieeya le wanaa nduaa piŋioo le.