Yosafate wa ntinu a Yuda wafwasa maziku ma Bale ye teke yakala muna nsi. Wazola vo nkangu wazaya e nsiku mia Yave. Muna kuma kiaki, watuma akuluntu ye Anelevi muna Yuda yawonso mu longa nkangu e nsiku mia Yave.

E zunga yakala lukufi wonga bamonanga wa nuanisa Yuda kadi bazaya wo vo Yave wataninanga nkangu andi. Batwasa nkutu tukau kwa Yosafate wa ntinu. Kuna kwalanda, wan’a Moabe, Amone ye awana batuka kuna zunga kia Seyire, bayiza nuanisa Yuda. Yosafate wazaya wo vo kafwete vava lusadisu lwa Yave. Wabokelesa akala awonso, akento ye wana muna Yerusaleme. Vana meso ma nkangu awonso, wasamba vo: ‘E Yave, kondwa lusadisu lwaku, ke tulendi sunda ko. Dodokolo, utuzayisa dina tufwete vanga.’

Yave wavana e mvutu za sambu kiau. Wabavovesa vo: ‘Ke numoni wonga ko. Ikunusadisa. Nukiatama, nutelama yo mona una ikunuvuluzila.’ Aweyi Yave kabavuluzila?

Muna mene walanda, Yosafate wasola ayimbidi yo kubavovesa vo bakala kuna ntwal’a makesa. Bavaika muna Yerusaleme yo kwenda vana fulu banwanina e vita kiayikilwanga vo Tekoa.

Ekolo ayimbidi bakembelelanga Yave ye kiese kiawonso muna ndinga yangolo, Yave watanina nkangu andi. Wakotesa mavuanga vana vena wan’a Amone yo wan’a Moabe, bayantika vondana. Ke mosi ko muna yau wavuluka. Kansi, Yave watanina nkangu a Yuda, makesa ye anganga. O nkangu a nsi zakala lukufi bawá mawonso kavanga o Yave, bazaya wo vo Yave wakinu tanina nkangu andi. Aweyi Yave kevuluzilanga nkangu andi? Ovanganga wo mu mpila zayingi. Ke vuanga lusadisu lwa wantu mfunu ko muna vuluza nkangu andi.