Josafati, mulena wa Juda, naasinyize lialetare ni milimu ya Baale. Naabata kuli batu bazibe milao ya Jehova. Kacwalo, aluma manduna ni Malivi mwa Juda kaufela kuli bayo luta batu milao ya Jehova.

Linaha zeneli bukaufi nelisaba kulwanisa Juda kakuli neliziba kuli Jehova naali ni batu bahae. Mane nebatisanga limpo ku Mulena Josafati. Kono Mamoabi, Maamoni, ni bane bazwa kwa Seiri bataha kuto lwanisa Juda. Josafati naaziba kuli naatokwa tuso ya Jehova. Kacwalo, abiza baana, basali, ni banana kutaha kwa Jerusalema. Alapela fapilaa bona kaufela, ali: ‘Jehova, hausa lutusi halukoni kutula. Lutaluseze zeluswanela kueza.’

Jehova aalaba tapelo yeo, ali: ‘Musike mwasaba. Nika mitusa. Muitukiseze, muyeme mwa libaka zamina, mi mukabona monika mipiliseza.’ Jehova naabatusize cwañi?

Habusa kakusasana, Josafati aketa baopeli mi abataluseza kucaula fapilaa mpi. Bacaula kuzwa kwa Jerusalema kuyo fita kone kulwanelwa, ili kwa sibaka sesibizwa kuli Tekoa.

Baopeli hane balumbeka Jehova ka tabo ka linzwi lelituna, Jehova alwanela batu bahae. Atahisa kuli Maamoni ni Mamoabi balyangane hahulu kuli mane bakala kuitwanisa mwahalaa bona, mi hakuna wa ku bona yanaapilile. Kono Jehova naasilelelize batu ba kwa Juda, masole, ni baprisita. Batu bane bapila mwa linaha zeneli bukaufi bautwa zanaaezize Jehova, mi baziba kuli Jehova naasa lwanela batu bahae. Jehova utusanga cwañi batu bahae? Uezanga cwalo mwa linzila zeñata. Hatokwi kutusiwa ki batu kuli aeze cwalo.