Ok Jehosafat te aj kawil toj Judá ex e kubʼ t-xiten qe patbʼil oyaj te Baal ex qe tilbʼilal ateʼtoq toj ttnam. Tajtoq tuʼn tok kyojtzqiʼn xjal qe tkawbʼil Jehová. Tuʼntzunju, ex tsamaʼn qe nejenel ex qe aj Leví toj tkyaqil txʼotxʼ te Judá tuʼn t-xi kyxnaqʼtzaʼn tkawbʼil Jehová kye xjal.

In che xobʼtoq tnam nqayin ateʼ tuʼn kyok lipen tiʼj Judá tuʼnju ojtzqiʼntoq kyuʼn qa in nonin Jehová tiʼj ttnam. Axpe ikx xi kyiʼn oyaj te aj kawil Jehosafat. Noqtzun tuʼnj, aqeju xjal te Moab, Amón ex junjuntl tnam toj txʼotxʼ te Seír, i eʼx qʼojel tiʼj Judá. Ojtzqiʼntoq tuʼn Jehosafat qa iltoq tiʼj tuʼn ttzaj onin tuʼn Jehová. Tuʼntzunju ok tchmoʼn toj Jerusalén kykyaqil xinaq, moqa ichan, qe xuʼj, ex qe kʼwaʼl. Kywitz kykyaqil xjal lu ok ten naʼl Dios: «Jehová, mlayx qo kambʼane qa mintiʼ sonina qiʼje. Bʼinchama xtalbʼil, qʼamantza tiʼ kbʼantel quʼne».

Tzaj bʼiʼn Jehosafat tuʼn Jehová ex tzaj ttzaqʼweʼn: «Miʼn che tzaj xobʼe, ok chin onile kyiʼje. Kyxiʼye toj kytembʼile, che txulekuye ex kyqʼonk kywitze tiʼj alkye tten che kletele wuʼne». ¿Alkye tten che kleteltoq tuʼn Jehová?

Toj juntl qʼij, jaw tskʼoʼn Jehosafat qe bʼitzil ex xi tqʼamaʼn kye tuʼn kykubʼ nej kywitz qe soldad. I etz toj Jerusalén tuʼn kypon toj tembʼil jatumel tuʼn kyqʼojin, aju tkubʼ toj Tecoa.

Aʼyeju aj bʼitzil in che tzalajtoq ex in che bʼitzentoq te Jehová tukʼil nim tqʼajqʼajel kywiʼ. Akux in qʼojen Jehová tuʼn tklet ttnam, kubʼ tzpet kynabʼil aj Amón ex aj Moab tuʼn Jehová, ex e ok ten qʼojel kyxolx. Kykyaqilx e kyim. Noqtzun tuʼnj, kolin Jehová kyiʼj xjal te Judá, kyiʼj soldad, ex kyiʼj pal. Kykyaqil qe tnam nqayin ateʼ ok kybʼiʼn aju otoq bʼant tuʼn Jehová ex el kynikʼ tiʼj qa kukxtoq in kolin Jehová tiʼj ttnam kyiʼj aj qʼoj. ¿Alkye tten klet ttnam Jehová tuʼn? Toj nimku tten. Nya il tiʼj tuʼn kyonin xjal tiʼj Jehová.