သင်ခန်းစာ ၅၀
ယေဟောဝါ ယောရှဖတ်ကို ကာကွယ်ပေး
ယုဒဘုရင် ယောရှဖတ်ဟာ ပြည်တော်မှာရှိတဲ့ ဗာလရဲ့ ယဇ်ပလ္လင်တွေနဲ့ ရုပ်တုတွေကို ဖျက်ဆီးပစ်တယ်။ လူတွေကို ယေဟောဝါရဲ့ပညတ်တွေ သိစေချင်လို့ မှူးမတ်တွေနဲ့ လေဝိသားတွေကို ယုဒပြည်တစ်ဝန်း စေလွှတ်ပြီး သင်ခိုင်းတယ်။
ယေဟောဝါဟာ သူ့လူမျိုးနဲ့အတူရှိမှန်း အနီးအနားက တိုင်းပြည်တွေသိလို့ ယုဒပြည်ကို မတိုက်ရဲကြဘူး။ ယောရှဖတ်မင်းကို လက်ဆောင်တွေတောင် ပေးကြတယ်။ ဒါပေမဲ့ မောဘပြည်၊ အမ္မုန်ပြည်နဲ့ စိရဒေသက လူတွေ ယုဒပြည်ကို တိုက်ဖို့ လာနေတယ်။ ယောရှဖတ်ဟာ ယေဟောဝါ အကူအညီ လိုတယ်ဆိုတာ သိတယ်။ ဒါနဲ့ ဂျေရုဆလင်မြို့မှာ ယောက်ျား၊ မိန်းမ၊ ကလေးပါမကျန် အားလုံးကို စုရုံးခိုင်းလိုက်တယ်။ သူတို့အားလုံးရှေ့မှာ ဒီလို ဆုတောင်းတယ်– ‘ယေဟောဝါ၊ ကိုယ်တော်မပါဘဲ ကျွန်တော်တို့ မတတ်နိုင်ဘူး။ ဘာလုပ်ရမယ်ဆိုတာ ပြောပြပါ။’
ဆုတောင်းတာကို ယေဟောဝါ အခုလို အဖြေပေးတယ်– ‘မကြောက်နဲ့။ ငါ ကူညီမယ်။ နေရာယူကြပါ။ ငြိမ်ငြိမ်လေး ရပ်နေပြီး ဘယ်လို ကယ်တင်မယ်ဆိုတာ စောင့်ကြည့်နေပါ’ တဲ့။ ယေဟောဝါ ဘယ်လို ကယ်တင်ခဲ့သလဲ။
နောက်နေ့မနက်မှာ ယောရှဖတ်ဟာ သီချင်းသည်တွေကို ရွေးပြီး စစ်တပ်ရှေ့မှာ ချီတက်သွားဖို့ ပြောတယ်။ သီချင်းသည်တွေက ဂျေရုဆလင်မြို့ကနေ တေကော စစ်မြေပြင်ဆီ ချီတက်သွားကြတယ်။
ယေဟောဝါကို သီချင်းသည်တွေ အားရပါးရ သံပြိုင်ချီးမွမ်းသီဆိုတဲ့အခါ ယေဟောဝါဟာ သူ့လူမျိုးအတွက် စစ်တိုက်ပေးတယ်။ အမ္မုန်လူတွေနဲ့ မောဘလူတွေဟာ ရှုပ်ထွေးကုန်ပြီး အချင်းချင်း ပြန်တိုက်ကြတာ အားလုံး သေကုန်တယ်။ ဒါပေမဲ့ ယေဟောဝါဟာ ယုဒလူတွေ၊ စစ်သည်တွေနဲ့ ပုရောဟိတ်တွေကိုတော့ ကာကွယ်ပေးတယ်။ အနီးအနားက နိုင်ငံတွေဟာ ယေဟောဝါ လုပ်ပေးတာတွေကို ကြားတော့ သူ့လူမျိုးကို ကာကွယ်ပေးနေတုန်းပဲဆိုတာ သိသွားကြတယ်။ ယေဟောဝါဟာ သူ့လူမျိုးကို ဘယ်လို ကယ်တင်ပေးခဲ့သလဲ။ နည်းအမျိုးမျိုးနဲ့ပါပဲ။ အဲဒီလိုကာကွယ်ပေးဖို့ လူတွေရဲ့ အကူအညီ မလိုဘူး။
“ဒီစစ်ပွဲမှာ မင်းတို့တိုက်စရာ မလိုဘူး။ နေရာယူကြပါ။ ငြိမ်ငြိမ်လေး ရပ်နေပြီး ယေဟောဝါ ဘယ်လို ကယ်တင်မယ်ဆိုတာ စောင့်ကြည့်နေလိုက်ပါ။”—၂ ရာဇဝင်ချုပ် ၂၀:၁၇