Josafat tlanauatik ipan Judá. Kiijkuinik nopa tlaixpamitl kampa kiueyichiuayayaj Baal uan kinijkuinik nopa teteyomej ipan nochi altepetl. Josafat kinekiyaya nochi ma kiixmatikaj Jehová itlanauatiljuaj. Yeka kintitlanki ipan nochi altepetl Judá tlayakananij uan levitas ma tlamachtikaj Jehová itlanauatiljuaj.

Sekinok altepemej amo kinekiyayaj kinteuisej judáeuanij pampa kimatiyayaj Jehová kinpaleuiyaya. Yeka kitlauijuikiliyayaj Josafat. Teipa, moabeuanij, amóneuanij uan sekinok katli itstoyaj ipan tlali Seír kinteuitoj judáeuanij. Josafat kimatiyaya monekiyaya Jehová ma kinpaleui. Yeka kinsentilik ipan Jerusalén nochi tlakamej, siuamej uan konemej. Uan ininixpa momaijtok uan kiiljuik toTeotsij: “Jehová, tlaj amo titechpaleuis, amo uelis titlatlanisej. Yeka xitechiljui tlake uelis tijchiuasej”.

Jehová kitlakakilik Josafat uan kiiljuik: “Amo ximajmauikaj, na niinmechpaleuis. San ximoketsatij uan amo inmolinisej, uan inkiitasej kenijkatsa niinmechmakixtis”. ¿Kenijkatsa kinmakixtiskia Jehová?

Ualmostla, Josafat kintlapejpenik katli uikatiaskiaj uan kiniljuik ma tlayakanakaj. Inijuantij kistejkej Jerusalén uan yajkej Tecoa, kampa tlateuiskiaj.

Nopa uikanij ika pakilistli uikatiauiyayaj, uan chikauak kiueyichiuayayaj Jehová. Jehová kinpaleuik itekipanojkauaj. Kichijki amóneuanij uan moabeuanij ininseltsitsij ma moteuikaj uan ma momiktikaj. Nochi ininkualankaitakauaj mijkej. Kiampa Jehová kinmakixtik judáeuanij, tlateuianij uan sacerdotes. Nochi sekinok altepemej kimatkej tlen panotoya uan kiitakej Jehová nojua kinmanauiyaya itekipanojkauaj. Jehová nochipa kinmanauia itekipanojkauaj, uan amo moneki maseualmej ma kipaleuikaj.