Jozafati mambo wo Judha, wakaphwanya-phwanya madandiro a Bhaari no zvithombe zvainga mu nyika. Iyena waida kuti vandhu vazive mutemo wa Jehovha. Ngokudaro wakatumira vatungamiriri no vaRevi kuti vaende kojijisa vandhu vo mu nyika yese yo Judha mutemo wa Jehovha.

Vandhu vamweni vo majinja o phedo vaithya kuhwisa vaJudha ngokuti ivona vaizviziva kuti Jehovha ano vandhu vake. Vaitoviisa zvipo kuna Mambo Jozafati. Asi vaMoabhi, vaAmoni no vaya vaibva ku mativi o Sieri vakaviya kohwisa vaJudha. Jozafati waizviziva kuti waida besero ra Jehovha. Ngokudaro wakaita kuti vanarume, vanakaji no vana vadoko vese vaungane mu Jerusarema. Wakatanga kuita mukumbiro pamberi po vese eciti: ‘Jehovha, mukatama kutibesera, tinoparajwa. Tapota tibvunjenyi zvotinodikana kuita.’

Jehovha wakadavira mukumbiro wavo eciti: ‘Mucadothya. Ndinozomubesera. Rambanyi makaima mu ndau jenyu, muvone kuti ndinozomuponesa.’ Jehovha wakaitisa kudini kuti avaponese?

Co mangwanani, Jozafati wakasana vaimbi zve wakabvunja kuti vaende pamberi po masoca. Ivona vakabva ku Jerusarema kwenda ku ndau yaidaninjwa Tekowa kwaitihwaro hondo.

Vaimbi vaya pavaimba ivona vaidakara maningi zve vaikuja Jehovha ngo izwi guru, Jehovha waihwira vandhu vake. Jehovha wakaita kuti vaAmoni no vaMoabhi vatange kubararika hwiru, votanga kuhwisana ngo cavo zve apana na umwe wavo wakapona. Asi Jehovha wakajivirira vaJudha, masoca no vapiri. Vandhu vese vainga phedo no munyikemo vakazwa zvainga zvakaitwa ndi Jehovha, vakaziva kuti Jehovha acindori kuhwira vandhu vake. Jehovha anoponesa kudini vandhu vake? Anoshandisa njira jakawanda. Iyena aadi besero ro vandhu kuti aite zvondozvo.