Jeosafa, ankho ohamba yo Judaa, wahanya-po omitala vio vilikutila vio tyikahuku tyitiwa Baale no vilolo ankho vikahi motyilongo. Ankho uhanda ovanthu vanoñgonoke ovitumino via Jeova. Atumu ovana vohamba no va Levita motyilongo tyo Judaa aiho opo vakalongese ovanthu ovitumino via Jeova.

Omalongo akala popepi ankho ena owoma wokuluisa otyilongo tyo Judaa mokonda ankho vetyii okuti Jeova wamena ovanthu vae. Alo umwe omalongo oo ankho atuaila ovipuka Ohamba Jeosafa. Mahi konyima ovanthu vo ko Moabe, no vo ko Amoo, na vana vatunda kotyilongo tyo Seile aveya okuluisa o Judaa. Jeosafa ankho utyii okuti wesukisa okukuatesuako na Jeova. Atumu ovanthu aveho, ovalume, novakai, novana vende ko Jelusalei. Elikuambela komutwe wovanthu aveho, okuti: ‘Jeova inkha kutukuatesako onthue kamatutyivili okulwa. Mbambavo tupopile etyi tuna okulinga.’

Jeova akumbulula elikuambelo okuti: ‘Muhatilei owoma. Ame mandyimukuatesako. Kalei tyitai iya amutale oñgeni mandyimuyovola.’ Oñgeni Jeova meveyovola?

Motyinthiki tyalandula-ko, Jeosafa aholovona ovanthu ovanongo kokuimba evepopila vapite komutwe womafualali otyo vaimba. Avaende okutunda ko Jelusalei alo pohika itiwa Tekoa pana mavaluila.

Putyina ovalume ovo vahivilika Jeova noviimbo no nondaka mbaya peulu, Jeova alingi otyipuka tyimwe tyihuvisa. Anguanguanesa ova Amoo no va Moabe avehimbika okulwa poyavo, apahahupu omunthu nawike. Jeova aamena ovanthu vo Judaa, ngetyi apopile. Ovilongo aviho vikahi popepi avetyiivi etyi Jeova alinga, iya avaimbuka okuti Jeova nkhele waamena ovanthu vae. Oñgeni Jeova ayovola ovanthu vae? Uveyovola mononkhalelo ononyingi. Opo ayovole kesukisa okukuatesuako novanthu.