Иудӕйы паддзах Иосафат ныппырх кодта Ваалы нывондхӕссӕнтӕ ӕмӕ къухӕйконд хуыцӕутты. Иосафаты фӕндыд, цӕмӕй адӕм Йегъовӕйы закъӕттӕ зыдтаиккой. Гъемӕ кънйӕзты ӕмӕ левитты арвыста, цӕмӕй ӕнӕхъӕн Иудӕйы адӕмӕн Йегъовӕйы закъӕттӕ амыдтаиккой.

Сӕ алыварс цы адӕмтӕ цард, уыдон зыдтой, Йегъовӕ йӕ адӕмӕн кӕй ӕххуыс кӕны, ӕмӕ сӕ ныхмӕ рацӕуын тарстысты. Суанг ма паддзах Иосафатӕн лӕвӕрттӕ дӕр ӕрвыстой. Фӕлӕ уӕддӕр фӕстӕдӕр моавӕгтӕ, аммонӕгтӕ ӕмӕ Сеиры цӕрджытӕ Иудӕйы зӕхмӕ ӕрбабырстой. Иосафат ӕмбӕрста, Йегъовӕйы ӕххуыс ӕй кӕй хъӕуы, уый. Иерусалимы ӕрӕмбырд кодта нӕлгоймӕгты, сылгоймӕгты ӕмӕ сывӕллӕтты се ’ппӕты дӕр ӕмӕ сӕ разы Хуыцаумӕ скуывта: «Йегъовӕ, ӕнӕ дӕуӕй сӕ ныхмӕ нӕ фӕлӕудзыстӕм. Курӕг дӕ стӕм, куыд кӕнӕм, уый нын бацамон».

Йегъовӕ йын йӕ куывд фехъуыста ӕмӕ загъта: «Ма тӕрсут. Ӕз уын баххуыс кӕндзынӕн. Сымах уӕ бынӕтты слӕуут, ӕнцад лӕуут ӕмӕ кӕсут, ӕз уӕ куыд фервӕзын кӕндзынӕн, уымӕ». Цымӕ сӕ Йегъовӕ куыд фервӕзын кодта?

Дыккаг бон райсомӕй Иосафат зарӕггӕнджыты равзӕрста ӕмӕ сын загъта, цӕмӕй ӕфсады разӕй цыдаиккой. Уыдон дӕр Иерусалимӕй араст сты, се знӕгтимӕ кӕм хъуамӕ схӕцыдаиккой, уыцы бынатмӕ, Фекойӕ, зӕгъгӕ.

Зарӕггӕнджытӕ Йегъовӕйы цингӕнгӕйӕ хъӕрӕй кадджын кодтой, Йегъовӕ та йӕ адӕмы сӕрыл тох кодта. Йегъовӕ афтӕ бакодта, ӕмӕ аммонӕгтӕ ӕмӕ моавӕгтӕ кӕрӕдзи ныхмӕ фесты ӕмӕ кӕрӕдзи цӕгъдын райдыдтой. Иу дӕр сӕ удӕгасӕй нӕ баззад. Иудӕйы адӕмӕй, се ’фсӕддонтӕй ӕмӕ сӕ сауджынтӕй та иуыл дӕр ницы ӕрцыд – Йегъовӕ сӕ фервӕзын кодта. Сӕ алыварс бӕстӕты адӕм иууылдӕр фехъуыстой, Йегъовӕ цы сарӕзта, уый, ӕмӕ йӕ бамбӕрстой, йӕ адӕмы раздӕрау кӕй ирвӕзын кӕны. Йегъовӕ алы хатт дӕр фӕзоны, йӕ адӕмы куыд фервӕзын кӕна, уый, ӕмӕ йӕ искӕй ӕххуыс нӕ фӕхъӕуы.