Si Jehosafat ya ari na Juda et dinederal to ray altar nen Baal tan saray idolo ed amin ya lugar ya sakop to. Labay ton naamtaan na totoo iray ganggan nen Jehova. Kanian imbaki to ray prinsipe tan Levita ed interon Juda pian ibangat dad totoo iray ganggan nen Jehova.

Natatakot ya onlusob ed Juda iray bansa ya kaabay da ta amta ran tutulongan nen Jehova iray totoo to. Iikdan da ni ingen na regalo si Arin Jehosafat. Balet saray Moabita, Ammonita, tan saray manaayam ed Seir et naniiba pian labanan so Juda. Amta nen Jehosafat ya kaukolan toy tulong nen Jehova. Tinipon tod Jerusalem so amin ya lalaki, bibii, tan ugugaw. Inmalagey ed arapan da si Jehosafat tan nampikasi: ‘Jehova, agkami manalo no agmo kami tulongan. Ibagam komon no antoy gawaen mi.’

Inebatan nen Jehova so pikakasi to, ya kuan to: ‘Agkayo natatakot. Tulongan ta kayo. Alagey kayo tan manbantay ki labat. Nengneng yo so pangiligtas kod sikayo.’ Panon iran inligtas nen Jehova?

Diad kaimbuasan, nampili si Jehosafat na saray managkansion tan imbaga ton manmartsa ira ed unaan na saray sundalo. Manlapud Jerusalem et nanmartsa ira paonlad lugar ya panlabanan da, diad Tekoa.

Legan iran maliket ya mankakansion na panangirayew parad si Jehova, akilaban si Jehova parad saray totoo to. Ginulo toy nonot na saray Ammonita tan Moabita kanian sikara lan mismo so nanlalaban, tan inatey iran amin. Balet inligtas nen Jehova iray totoo na Juda, saray sundalo, tan saray saserdote. Abalitaan na amin ya totoo ed saray bansan kaabay da so ginawa nen Jehova, tan amta da ya sikato so milalaban parad totoo to. Panon ya ililigtas nen Jehova iray totoo to? Nandurumay paraan to. Agto kaukolan so tulong na too pian niligtas to ra.