50 KAQ WILLAKÏ
Jehovämi Jehosafat-ta yanaparqan
Jehosafatqa Judäpa reyninmi karqan, y imäginkunata y Baal nishqan diospa altarninkunatam Judäpita ushakätsirqan. Jehoväpa leyninkunata llapankuna musyayänantam pëqa munarqan. Tsëmi dirigentikunata y levïtakunata kacharqan entëru Judächö Jehoväpa leyninkunata yachatsikuyänampaq.
Amänun nacionkunachöqa mantsayaqmi Judäwan guërrata rurëta, porqui markanta Jehovä yanapanqantam musyayaq. Jina rey Jehosafatpaqpis qarëninmi apayaq. Peru juk kutiqa Moabchö, Ammonchö y Seir ëwëchö täraq nunakunam Judäwan pelyaq ëwayarqan. Jehosafatqa musyarqanmi Jehovä yanapananta wananqanta. Tsëmi llapan ollqukunata, warmikunata y wamrakunata Jerusalenman qayatsirqan. Y puntankunachömi kënö mañakurqan: “Jehovä, qam mana yanapayämaptikiqa manam vencita puëdiyäshaqtsu. Imata rurayänäpaq kaqta niyämänëkipaqmi rogakuyaq”.
Tsënam Jehoväqa kënö contestarqan: “Ama mantsayëtsu, noqam yanapayashqëki. Pelyayänëki sitiuman ëwayë, tsëchö shëkar quedakuyë y imanö salvayanqaqta rikäyë”. Y, ¿imanötaq salvarqan?
Waränin junaqqa patsa waräriptinllam Jehosafatqa cantaqkunata akrarqan y tröpakunapa puntanta ëwayänampaq nirqan. Tsënömi pelyayänan sitiuman ëwayarqan. Tsë sitiupa jutinqa Tecöam karqan.
Cantaqkunaqa llapan kallpankunawanmi Jehoväta alabar kushishqa cantayarqan. Tsëyaqmi Jehoväqa chikeqninkunata pantatsir usharqan. Tsëmi Ammon nunakuna y Moab nunakunaqa kikinkunapura pelyar qallëkuyarqan, y llapanmi wanuyarqan. Tsënömi Jehoväqa Judä nunakunata, soldädukunata y sacerdötikunata salvarqan. Më tsë nacionchömi tsëta musyariyarqan, y markanta Jehovä salvar sïguinqantam cuentata qokuyarqan. ¿Imanötaq Jehoväqa markanta salvan? Tukïnöpam. Pëqa manam wanantsu pipis yanapananta.
“Kë guërrachöqa manam pelyayankitsu. Sityïkikunaman churakäyë, shëkar quedakuyë y rikäyë Jehovä imanö salvayäshunqëkita” (2 Crönicas 20:17).