Mandaj Josafatca (Jehosafat) Baal diostapish shujtaj yanga dioscunatapishmi Judá llajtamanta tucui anchuchirca. Dios mandashcacunata gentecuna yachachunmi munarca. Chaimantami pushajcunatapish levitacunatapish tucui Judá llajtapi Dios mandashcacunata gentecunaman yachachichun cacharca.

Cꞌuchulla llajtacunapi causajcunaca Jehová ayudaj cashcata yachashpami judiocunahuan macanacunata mancharcacuna. Chaimantami mandaj Josafatman regalocunata cujcuna carca. Pero moabitacuna, amonitacuna, Seir urcupi tiyaj pueblocunaca Judahuan macanacungapajmi shamurcacuna. Josafatca Diospaj ayudata minishtishcatami yacharca. Chaimantami, tucui cꞌaricunata, huarmicunata, huahuacunatapish Jerusalenpi tandachirca. Chaimi paicunapaj ñaupajpi, ‘Jehová Dioslla can ayudajllapimi cai macanacuitaca mishashun. Imata ruranata huillahuai’ nishpa Diosta mañarca.

Diosca Josafat mañashcata uyashpami, ‘ama manchaichijchu. Ñucami ayudasha. Casijlla shayanguichijlla. Chashnami cancunata ñuca quishpichijta ricunguichij’ nirca. ¿Ima shinataj Diosca quishpichirca?

Cayandij tutamantaca Josafatca cantajcunata agllashpami soldadocunapaj ñaupajpi richun churarca. Chashnami Jerusalenmanta llujshishpa Tecoa nishca macanacuna pambaman rirca.

Cantajcunaca sinchita cantashpami Jehová Diosta cushicushpa alabacurcacuna. Cantacujpica Diosmi paicunamanta macanacucurca. Chaimantami amonitacuna, moabitacunapish paicunapura macanacui callarircacuna. Chashnami tucuicuna huañurca. Pero Diosca judiocunata, soldadocunata, sacerdotecunatapish cuidarcami. Cꞌuchulla llajtacunaca Jehová paipaj llajtata contracunamanta cuidacushcatami yacharcacuna. ¿Jehová Diosca ima shinataj cunanpish paipaj llajtata cuidacun? Tucui layami cuidan. Paica gentecunapaj ayudataca mana minishtinchu.