Josafatqa Juda naciontam kamachirqa, hinaspam Baal taytachatawan huk taytachakunata chinkarachirqa. Josafatqa munarqam runankuna Jehova Diosta kasukunankuta, chaymi jefekunatawan Leviy castakunata kamachirqa nacionninpi runakunaman Diosmanta yachachinankupaq.

Jehova Diosñataqmi Juda nacionta yanaparqa, chaymi hichpanpi llaqtakunapas manchakuqku, hinaspam regalokunata Josafatman apaqku. Amonmanta hinaspa Moabmanta chaynataq Seir urqumanta runakunam ichaqa Juda nacionpa contranpi hatarirurqaku. Chaymi Josafatqa Jerusalenpi qarikunata, warmikunata hinaspa warmakunata huñuykuspan paykunapa qayllanpi Jehova Diosta mañakurqa: “Diosllayku yanapaykullawayku. Niwaykuyá imatapas ruwanaykupaq”, nispan.

Mañakusqanta uyariykuspanmi Diosqa nirqa: “Allinta sayaspayá takyaychik. Qawankichikmi imayna yanapasqayta. Amayá manchakuychikchu”, nispa.

Paqarinnintinmi Josafatqa takiqkunata akllaspan nirqa: “Guerraman lluqsiqkunapa puntantam takistin rinkichik”, nispa. Paykunaqa Jerusalenmantam lluqsirqaku Tecoa sutiyuq chunniqman.

Chaypi lliw kallpankuwan takichkaptinkum Jehova Diosqa Amon hinaspa Moab castakunata pantanarachirqa, chaymi kikinkupura wañurachinakurqaku. Juda nacionpa soldadonkunawan sacerdotekunam ichaqa mana wañurqakuchu. Chayta uyariruspankum hichpankupi yachaqkunaqa Juda nacionwan Jehova Dios kasqanta yacharurqaku. Jehova Diosqa tukuy imata ruwaspanmi yupaychaqninkunata yanapan.