Judá nacionmanta rey Jehosafatmi (Josafat) Baal diospa altarninkunata llapa idolokunatapas thunichiran. Payqa Jehová Diospa leyninkunata yachanankutan munaran. Chaymi umalliqkunata Leví runakunatawan kacharan Judapi kaq llapa runakunaman yachachinankupaq.

Judá nacionpa muyuriqninpi tarikuq llaqtakunaqa repararankun Diospa yanapasqanta. Jinan regalokunataraq Jehosafatman aparanku. Moab, Amón, Seír llaqtamanta runakunan ichaqa, juñukuranku Judá nacionwan maqanakunankupaq. Jehosafatqa yacharanmi Diospa yanapayninta necesitasqankuta. Chaymi Jerusalenpi qharikunata, warmikunata, wawakunatawan juñuran. Paykunaq ñaupaqenpin mañakuran: “Jehová Diosniy, qanpa yanapaynillaykiwanmi atipasaqku. Imachus ruwanaykuta niwayku”, nispa.

Diosqa uyariranmi mañakusqanta, jinan niran: “Ama manchakuychischu, noqan yanapasaykichis. Sitioykichispi kaspa rikuychis imayna salvasqayta”, nispa. ¿Imaynatan salvaran?

Qhepantin p’unchaymi Jehosafatqa takiqkunata juñuspa soldadokunaq ñaupaqenta purichiran. Jinaspa Jerusalén llaqtamanta riranku Tecoa ladoman.

Takiqkunaqa kusisqan Jehová Diosman alto kunkawan takiranku. Chaykaman Diosqa llaqtanrayku maqanakuran. Amón runakunatan Moab runakunatawan locoyachiran, jinan paykunapura maqanakuranku. Llapallankun wañuranku, ichaqa Judá nacionpi runakuna, soldadokuna, sacerdotekunapas manan wañurankuchu. Jinan muyuriqninpi tarikuq nacionkuna yacharanku Diosqa llaqtanta enemigonkunamanta salvasqanta. ¿Imaynatan Jehová Dios llaqtanta salvan? Imaymana formamantan, payqa manan necesitanchu runakunaq yanapanantaqa.