O Josafat, o kralj ki Juda, uništindža sa e Valese oltarija hem idolija ki odija phuv. Ov manglja o manuša te džanen e Jehovase zakonja. Odoljese bičhaldža knezija hem Levitija te sikaven sa e narodo ki Juda ando akala zakonja.

O narodija so hine paše, darandilje te napadinen e Juda sose džandže so o Jehova arakhi pe narodo. Čak, ljegardže poklonja e Josafatese. Ama, palo disavo vreme, o Moavcija, o Amoncija hem o manuša so živindže ko Sir čedindže pe te maren pe protiv i Juda. O Josafat džandža so valjandža ljese e Jehovasi pomoć. Odoljese naredindža sa o murša, o džuvlja hem o čhave te aven ko Jerusalim. Anglo celo narodo, molindža pe: „Jehova, bizo tute našti te pobedina. Molinaja tut, phen amendže so te čera.“

O Jehova odgovorindža ki akija molitva: „Ma daran, me ka pomožinav tumen. Samo astaren tumare thana, terdžoven hem dikhen sar ka spasinav tumen.“ Sar o Jehova spasindža ljen?

Tajsato dive sabalje, o Josafat birindža jekh grupa pevačija hem phendža ljendže te džan anglji vojska. On dželje ando Jerusalim ko than kuri valjandže te maren pe. Odova than vičindža pe Tekoja.

Dži o pevačija radosno hvalindže e Jehova ko celo glaso, o Jehova borindža pe peklje narodose. Ov čerdža o Moavcija hem o Amoncija te oven odobor bunime so počmindže te maren pe maškaro peste hem nijekh oljendar na ačhilo dživdo. Ama, o Jehova zaštitindža peklje narodo ki Juda, e vojnikonen hem e sveštenikonen. Sa o manuša so živindže ko avera thana šundže sa so čerdža o Jehova hem haljilje so o Jehova pana zaštitini peklje narodo. Sar o Jehova spasindža peklje narodo? Ko but načinja. Te šaj te čerel odova, oljese na valjani pomoć ando manuša.