Андэ Иуда, кай правияс о царё Иосафато, слинэ жертвенникоря лэ хохавнэ дэвлэсти лэ Ваалости. О Иосафато уля лэн, кай вонэ тэ на авэн. Во камэлас, кай о народо тэ ӷанэн лэ Иеговаско законо. Во ԥэндя лэ князёнэнди и лэ левитонэнди, кай вонэ тэ прожан па всаворэ фороря андэ Иуда. Васо? Кай тэ сытярэн лэ народос лэ Дэвлэстирэ законости.

И народоря, савэ жувэнас паша лэндэ, даранас тэ жан по царство Иуда, важ кода кай ӷанэнас, кай о Иегова фэрий лэ израильтянонэн. Кадэла народоря даже бишалэнас подаркоря лэ царёсти лэ Иосафатости. Но еқвар и мануша анда Моаво, Аммоно и Сеиро закамлэ тэ жан пэ Иуда. О Иосафато ӷанэнас, кай би лэ Иеговаско во на вицэлэла кадэя война. О царё стидя всаворэ народос андо Иерусалимо, лэ муршэн, лэ жувлян и лэ бэятонэн. О Иосафато англа мануша ля тэ мангэлпэ: «Иегова, би тиро амэ на вицэласа кадэлэн вороӷонэн. Мангас тут, ԥэн, со амэнди тэ терас».

О Иегова ԥэндя: «На даран. Мэ поможысарава тумэнди. Тердён, нисо на терэн и диқэн, сар мэ фэрисарава тумэн». Кадя во сыкадя, кай ашундя лэндири молитва. Сар о Иегова фэрисардя пэстирэ народос?

Пэ авэр тэсара о Иосафато стидя лэ воинонэн и жыля андэ кодэя риг, кай сас о форо Фекоя. Котэ трэбуй сас тэ марэнпэ. Англа воиноря во стодя кодэлэн, ко дилабэл.

Кала кодэла, ко дилабэн, линэ фартэ ла радостяса тэ прославляют лэ Иеговас, о Иегова ля тэ марэлпэ важ пэско народо. Во стердя кадя, кай и мануша анда Аммоно и Моаво на ӷанэнас, со тэ терэн и линэ тэ умарэн ек еқэс. Нико на ашэляпэ жундо. Но лэ манушэнца анда Иуда, ай кадяжэ лэ воинонэнца и лэ рашанца, нисо на стердяпэ. Пала кода, со о Иегова стердя, уӷанглэ всаворэ народоря, савэ жувэнас паша лэндэ. Вонэ полинэ, кай о Иегова на парашэл тэ фэрий пэстирэ манушэн. Сар адес о Иегова фэрий пэстирэ народос? Во бут сар фэрий лэ манушэн и лэсти на трэбуй сас андэ када лэ манушэнго зор.