Yosafate akhali mambo wa ku Yuda. Iye afudza maguwa a Bhaale na adzimunthu. Iye akhafuna kuti anthu adziwe mitemo ya Yahova. Natenepa, iye asankhula amuna akhadziwa mwadidi miyambo ya Yahova toera kupfundzisa mbumba.

Madzindza akhali cifupi akhagopa kumenyana na Ayuda, thangwi iwo akhadziwa kuti Ayuda akhali mbumba ya Yahova. Madzindza anewa apereka miyoni kuna Mambo Yosafate. Mbwenye Amoabhu, Amoni na anthu akhali ku cisa ca Seyire aenda kamenyana na Ayuda. Yosafate akhadziwa kuti akhafuna ciphedzo ca Yahova. Iye apanga Ayuda onsene, amuna, akazi na ana toera aende ku Yerusalemu. Yosafate alimira patsogolo pa Ayuda mbaphembera: ‘Yahova, mungakhonda kutiphedza ife nee tinawina. Taphata miyendo, tipangeni pinafunika ife kucita.’

Yahova atawira phembero: ‘Lekani gopa, ndinakuphedzani. Lekani kumenyana nawo, basi ene onani kuti ndinadzakupulumusani tani.’ Kodi Yahova aapulumusa tani?

Mangwana mwace na macibese, Yosafate asankhula anyakuimba mbaapanga kuti akhale kutsogolo kwa anyankhondo. Iwo abuluka mu Yerusalemu mbakaimba mpaka ku Tekoya mbuto ikhafuna kucitirwa nkhondo.

Mu ndzidzi ukhaimba iwo mwakutsandzaya na mwakugaluza, Yahova akhatsidzikiza mbumba yace. Yahova acitisa kuti Amoni na Amoabhu atome kumenyana okha-okha mpaka onsene kumala kufa. Mbwenye Yahova akhatsidzikiza mbumba ya Yuda, anyankhondo na anyantsembe. Anthu onsene akhali cifupi abva pyonsene pidacita Yahova, pontho adziwa kuti Yahova akhapitiriza kutsidzikiza mbumba yace. Kodi Yahova asatsidzikiza tani mbumba yace? Yahova asaphatisira njira zizinji. Iye nee asafuna ciphedzo ca anthu toera kutsidzikiza mbumba yace.