Jehoshafati inkhosi yakaJuda wabhidlita emalati aBhali netitfombe eveni lonkhe. Abefuna kutsi bantfu bati imitsetfo yaJehova. Ngako watfuma tikhulu nemaLevi kutsi ayofundzisa bantfu imitsetfo yaJehova kulo lonkhe live lakaJuda.

Tive letibomakhelwane betesaba kuhlasela bantfu bakaJuda ngobe betati kutsi Jehova uyabavikela bantfu bakhe. Taze taletsela iNkhosi Jehoshafati tipho. Kodvwa bakaMowabi, baka-Amoni nebasesifundzeni saseSeyiri beta batokulwa nebakaJuda. Jehoshafati bekati kutsi udzinga kusitwa nguJehova. Wabita onkhe emadvodza, bafati nebantfwana kutsi bete eJerusalema. Wathantaza asembikwabo bonkhe watsi: ‘Jehova, sicela usitjele kutsi senteni ngobe ngaphandle kwakho angeke sincobe.’

Jehova wawuphendvula lomthantazo, watsi: ‘Ningesabi, ngitanisita. Manini etindzaweni tenu nicine, nitawubese niyabona kutsi ngitanisita njani.’ Jehova wabasindzisa njani?

Ngakusasa ekuseni, Jehoshafati wakhetsa emadvodza lahlabelako kutsi ashuce embikwelibutfo lemphi. Lamadvodza ashuca esuka eJerusalema aya eThekhowa, lapho bekayokulwa khona.

Njengobe lamadvodza abesahlabela, advumisa Jehova ajabulile, Jehova wabalwela. Wenta kutsi baka-Amoni nebakaMowabi basangane baze bacala kubulalana bodvwa futsi kute lowasindza. Kepha Jehova wabavikela bantfu bakaJuda, emasotja kanye nebaphristi. Tonkhe tive letibomakhelwane teva ngaloko Jehova labekwentile futsi bati kutsi solo uyabavikela bantfu bakhe. Jehova wabasindzisa njani bantfu bakhe? Wabasindzisa ngetindlela letinyenti. Akadzingi kusitwa bantfu kuze ente loko.