Yehosyafat, datung Yehuda něndusa mezbah Baal dingangu manga berhala su wanuane. I sie mapulu rakyate masingkạ hukung i Yehuwa. Hakị u ene, i sie něngoro pirang katau pejabat dingangu tau Lewi sarang kěbị wilayah Yehuda gunang měněntiro hukung i Yehuwa su taumata.

Manga bangsa maraning Yehuda matakụ lumawang Yehuda, ual᷊ingu i sire masingkạ Yehuwa mětẹ̌tul᷊ung umat’E. I sire lai nẹ̌bawa hadiah su Datu Yehosyafat. Katewe tau Moab, Ammon, dingangu taumata bọu daerah Seir mapulu mělawang tau Yehuda. Yehosyafat masingkạ i sie harusẹ̌ makitul᷊ung si Yehuwa. I sie něngoro kěbị esẹ, wawine, dingangu manga rariọ pẹ̌tampung su Yerusalem. Bọu ene i sie nẹ̌doa su těngong i sire kěbị, ’Yehuwa, mạeng i kau tawe mẹ̌tul᷊ung, i kami tawe makauntung. Tul᷊ungko paul᷊ị apa harusẹ̌ koateng i kami.’

Yehuwa simimbahẹ̌ daroane, ’Abe katakụ. Iạ sarung mẹ̌tul᷊ung si kau. Pẹ̌sasadiạe su tampạ i kamene, tatapẹ̌e darisị, kụ pěmanda kerea Iạ měnal᷊amatẹ̌ si kamene.’ Kerea i Yehuwa něnal᷊amatẹ̌ si sire?

Dịěllone mal᷊ukadẹ̌, Yehosyafat němile taumata gunang mẹ̌kantarị, kụ něngoro si sire dal᷊eng kal᷊imona su těngong prajurit. I sire dimal᷊eng bọu Yerusalem sarang tampạ mẹ̌pěrang su Tekoa.

Bọu ene, i sire mal᷊uasẹ̌ nẹ̌dalo si Yehuwa dingangu tingihẹ̌ maihạ. Su tempo ene Yehuwa nẹ̌pěrang gunang umat’E. I Sie někoạ tau Ammon dingangu tau Moab nẹ̌bingọ kụ i sire nẹ̌papate. Tawẹ apa bọu i sire nasal᷊amatẹ̌. Katewe, Yehuwa něndiagạ tau Yehuda, manga prajurite, dingangu manga imang. Kěbị taumata maraning Yehuda nakaringihẹ̌ apa nikoạ i Yehuwa, kụ i sire nakasingkạ i Yehuwa bědang mětẹ̌tul᷊ung umat’E. Kerea Yehuwa něnal᷊amatẹ̌ umat’E? Yehuwa něpakẹ haghing cara. Tawe harusẹ̌ piạ taumata mẹ̌tul᷊ung si Sie.