Ko Sihosafate, ʻa e tuʻi ʻo Siutá, naʻá ne fakaʻauha ʻa e ngaahi ʻōlita ʻo Pēalí mo e ngaahi ʻaitoli ʻi he fonuá. Naʻá ne loto ke ʻiloʻi ʻe he kakaí ʻa e ngaahi lao ʻa Sihová. Ko ia naʻá ne fekauʻi atu ai ʻa e kau houʻeiki mo e kau Līvai ki Siuta kotoa ke nau akoʻi ʻa e ngaahi lao ʻa Sihová ki he kakaí.

Ko e ngaahi puleʻanga ofi maí naʻa nau ilifia ke ʻohofi ʻa Siuta he naʻa nau ʻiloʻi naʻe kau ʻa Sihova mo hono kakaí. Naʻe aʻu ʻo nau ʻave ʻa e ngaahi meʻaʻofa kia Tuʻi Sihosafate. Ka naʻe haʻu ʻa e kau Mōapé, kau ʻĀmoní, mo e faʻahinga mei he feituʻu Seiá ke tauʻi ʻa Siuta. Naʻe ʻiloʻi ʻe Sihosafate naʻe fiemaʻu kiate ia ʻa e tokoni ʻa Sihová. Naʻá ne fakatahatahaʻi mai ʻa e kakai tangata, kakai fefine, mo e fānaú kotoa ki Selusalema. Naʻá ne lotu ʻi muʻa ʻiate kinautolu kotoa: ‘ʻE Sihova, ʻi he ʻikai koé, heʻikai lava ke mau ikuna. Tala mai muʻa ʻa e meʻa ke mau faí.’

Ko e tali eni ʻa Sihova ki he lotú: ‘ʻOua ʻe ilifia. Te u tokoniʻi kimoutolu. Mou tuʻu ki homou tuʻuʻanga, ʻo tuʻu maʻu, pea sio ki he founga te u fakahaofi ai kimoutolú.’ Naʻe anga-fēfē hono fakahaofi kinautolu ʻe Sihová?

ʻI he pongipongi hono hokó, naʻe fili ai ʻe Sihosafate ha kau hiva pea tala ange ke nau laka ʻi muʻa ʻi he kau taú. Naʻa nau laka mei Selusalema ki he malaʻe taú ʻi he feituʻu ko Tēkoa.

ʻI hono fakahīkihikiʻi fiefia mo leʻo-lahi ʻe he kau hivá ʻa Sihová, naʻe tau ʻa Sihova maʻa hono kakaí. Naʻá ne ʻai ke puputuʻu lahi ʻa e kau ʻĀmoní mo e kau Mōapé ʻo kamata ai ke nau fetāmateʻaki, pea naʻe ʻikai ke hao ha taha ʻo kinautolu. Ka naʻe maluʻi ʻe Sihova ʻa e kakai ʻo Siutá, mo e kau sōtiá mo e kau taulaʻeikí. Naʻe fanongo ʻa e kakai kotoa ʻi he ngaahi fonua ofi maí ʻi he meʻa naʻe fai ʻe Sihová, pea nau ʻiloʻi naʻe kei maluʻi pē ʻe Sihova ʻa hono kakaí. Naʻe anga-fēfē hono fakahaofi ʻe Sihova ʻa hono kakaí? ʻI he ngaahi founga lahi. ʻOku ʻikai te ne fiemaʻu ha tokoni mei he tangatá ke ne fai ʻa e meʻa ko iá.