Ja Jehosafat, ja mandaranum bʼa Judá, sjomo el ja yaltarik ja dyos Baal. Cha xchʼaya snajel ja kʼulubʼalik dyos. Ja yeʼn skʼana ja chonabʼ a-snaʼe sbʼaj ja sleyik ja Jyoba. Ja yuj, sjeka ja olomalik sok ja levitaʼik bʼa yibʼanal ja Judá bʼa sjejelyi ja sleyik ja Jyoba.

Ja chonabʼik mojani wa xiwye tiroʼanel soka Judá yujni wa snaʼawe ja Jyoba wa skoltay ja xchonabʼi. Wa xyaweyi majtanalik ja Jehosafat. Pe ja swinkil Ammón, ja Moab sok tuk chonabʼik bʼa slujmal Seír waj tiroʼanuke soka Judá. Ja Jehosafat wa snaʼa wani skʼana ja skoltajel ja Jyoba. Ja yuj stsomo spetsanil ja winike, ixuke soka yal untik bʼa Jerusalén. Bʼa stiʼ sat yeʼnle yayi jun orasyon: «Jyoba, mi oj jkʼultikon ganar ta meyuk jawa koltaneli. Awa pabor, alakabʼtikon jas oj jkʼuluktikon».

Ja Jyoba smaklay ja orasyoni sok sjakʼa: «Mok xiwanik. Keʼn oj koltayex. Kaʼaxik bʼa wa lugarex, ti la kanyex tiw sok ilawik jastal oj koltayex». ¿Jastal maʼ koltani ja Jyoba?

Yajni el ja kʼakʼu, ja Jehosafat stsaʼa tsʼebʼanumik sok yalyabʼ aʼekʼuke bʼajtan yuja kʼakʼanumiki. Elye bʼejyel bʼa Jerusalén masan bʼa oj ajyuk ja tiroʼanel, bʼa jun lugar sbʼiʼil Tecoa.

Ja tsʼebʼanumik gusto lek stsʼebʼantaye tsats lek ja Jyoba. Malan ja Jyoba wan skoltajel ja xchonabʼi. Ya jom yolom ja swinkil Ammón soka Moab, sok yeʼnta kʼe tiroʼanuke. Chʼak chamuke spetsanile. Pe ja Jyoba stalnay ja swinkil Judá, ja kʼakʼanumiki sok ja sacerdoteʼik. Ja chonabʼik mojani yabʼye ja jas skʼulan ja Jyoba sok snaʼawe yeʼni wan skoltajel ja xchonabʼ. ¿Jastal wa skoltay ja Jyoba ja xchonabʼi? Bʼa jitsan modo. Ja yeʼn mi xmakuniyuj ja skoltanel ja ixuk winik.