Иуданың хааны Иосафат Ваал дээр меге бурганның шупту өргүл бедигээштерин узуткап каапкан. Чон Иегованың хоойлузун билир болзун деп, ол күзээн. Ынчангаш нояннарга болгаш левиттерге Иуданың шупту хоорайларында чонну Бурганның хоойлузунга өөредир кылдыр, ол дагзып каан.

Кожа чоннар Иуданы Иегова камгалап турар деп билир болгаш, халдаарындан коргар турган. Безин олар Иосафат хаанче белектер чоргузуп турган. Ынчалза-даа бир катап аммон, моав чоннар база Сеирниң чурттакчылары оларже халдаар деп шиитпирлеп алганнар. Иегованың дузазы чокта оларны тиилеп шыдавас бис деп, Иосафат билип турган. Ол Иерусалимче шупту эр-херээжен улусту база бичии уругларны кыйгырып алгаш, ыыткыр мөргээн: «Иегова, сен чокта тиилеп шыдавас бис. Чүнү кылырын айтып берем?»

Иегова ооң мөргүлүнге харыылаан: «Кортпаңар. Мен силерге дузалажыр мен. Мээң силерни канчаар камгалаарымны көрүңер». Иегова чонун канчаар камгалаан?

Даң бажында Иосафат дайынчыларын чыып алгаш, тулчуушкун болур черже, Текояже, үнүпкеннер. Аг-шерииниң мурнунга ыраажыларны ол тургузуп алган.

Ыраажылар өөрүшкүлүг ыыткыр ырлажырга, Иегова чону дээш тулчуп турган. Аммоннар болгаш моавтар девидей бергеш, бот-боттарынче халдап эгелээн. Оларның чаңгызы-даа дириг артпаан. Ынчалза-даа Иуданың чурттакчылары, өргээ бараалгакчылары база дайынчылар когараваан. Ол болуушкун дугайында кожа чоннар дыңнап кааш, Иегова чонун ам-даа камгалап турар-дыр деп билип каан. Бөгүн Иегова чонун канчаар камгалап турар? Аңгы-аңгы аргалар-биле, ынчангаш аңаа кижилерниң кандыг-даа киржилгези херек чок.