Josafata panjakany Joda tamy zen̈y. Niravan̈iny alitara ndreky sariny Bala tamy tany io. Tiany hahay lalàn̈any Jehovah vahoaka, ke nirahiny iro andriana ndreky Levita aby io hampianatra iro.

Tsy sakindro firenena narikitry tio nitafihin̈y Joda, fotony haindro fa Jehovah nan̈ampy vahoakanany. Iro nitondra kado tamy Panjaka Josafata. Tandraraiky, navy hiady tamy Joda iro Moabita ndreky Amonita aby io, baka io olo baka tamy faritry Seira. Hainy Josafata fa Jehovah zaraiky fo mahavita man̈ampy izy. Nirahiny nivory ta Jerosalema tao olo jiaby, lelahy, man̈angy, ndreky tsaiky. Baka tio izy nivavaka: ‘Jehovah, zahay resy koa tsy hampianao e. Volàn̈a aminay kony ino raha tokony hataonay.’

Ho Jehovah: ‘Anaro aza mavozo fa zaho han̈ampy anaro. Mangalà pilasy anaro, baka io mitsangàna fo mizaha fomba han̈avotako anaro.’ Karakory eky nataony Jehovah?

Nifidy pihira Josafata koa fa kiaka andra. Iro nirahiny nandeha talohany maramila. Iro niala ta Jerosalema nandeha ta Tekoa. An̈y iro hifanojy amy fahavalondro.

Ravoravo iro pihira aby io nihira mare sady nidera Jehovah. Tamy zen̈y Jehovah niady niny vahoakanany. Nataony nialamboetry iro Amonita ndreky Moabita aby io. Iro nifamono, ke naty iro jiaby. Jehovah ndraiky niaro vahoakany Joda ndreky maramila, baka io pisoron̈o aby io. Ren̈inolo jiaby narikitry tio raha nataony Jehovah io. Hitandro tamy zen̈y fa niaro vahoakanany fo Jehovah. Amy zioty, Jehovah koa mbala miaro vahoakanany fo, sady izy tsy mila olo han̈ampy izy amy zen̈y.