Yehosafati mwenye jwa ku Yuda jwajonasile malo gakupelecela mbopesi ga Baala soni milungu jakupanganyidwa m’cilamboco. Jwalakwe ŵasakaga kuti ŵandu amanyilile malamusi ga Yehofa. M’yoyo jwalakwe ŵatumisye acimlongola soni Alefi kuti akajiganye ŵandu malamusi ga Yehofa.

M’yoyo mitundu jajaŵandikene ni Ayuda jajogopaga kuputa nawo ngondo, ligongo jamanyililaga kuti Yehofa akwakamucisya. Jayikenesoni pakupeleka mituka kwa Mwenye Yehosafati. Nambo kaneko Amowabu ni Aamoni soni ŵane ŵakutyocela mu upande wa Seili ŵayice kukumenyana ni Ayuda. Yehosafati ŵayimanyi kuti ŵasosekwaga cikamucisyo ca Yehofa. M’yoyo jwalakwe ŵasongenye acalume, acakongwe soni ŵanace ku Yelusalemu. Jwalakwe jwapopesile kwa Yehofa pameso pa ŵanduwo kuti, ‘Yehofa pali pangali cikamucisyo cawo m’weji ngaŵa mkupunda. Conde atusalile yakutenda.’

Yehofa ŵajanjile lipopeloli. Jwalakwe ŵatite, ‘Mkajogopa. Cinamkamucisye. Ngatenganyika, jimani kuti mlole yacindende pakumkulupusya.’ Ana Yehofa ŵakulupwisye jemanjaji camtuli?

Kundaŵi kwa lisiku lyakuyicisya, Yehosafati ŵasagwile ŵakwimba nyimbo ni ŵasalile kuti ajendeje kusogolo kwa asilikali. Jemanjaji ŵajesile kutyocela ku Yelusalemu mpaka ku malo gakuputila ngondo gakolanjidwa kuti Tekowa.

Ŵakwimba ŵala paŵamlumbaga Yehofa mwakusangalala ali mkugumila, Yehofa ŵakamucisye ŵandu ŵakwe kupunda ngondojo. Jwalakwe jwatendekasisye kuti paŵe cisokonasyo pasikati pa Aamoni ni Amowabu, ni ŵatandite kumenyana acimsyenepe, mwamti pangali juŵakulupwice. Yehofa ŵacenjele Ayuda kupwatikapo asilikali ŵawo soni ŵambopesi. Ŵandu wosope m’yilambo yakuŵandicila ŵapikene yaŵatesile Yehofayi, soni ŵayimanyi kuti Yehofa akwakamucisya ŵandu ŵakwe. Ana Yehofa akusiŵakulupusya camtuli ŵandu ŵakwe? Akusatenda yeleyi m’matala gakulekanganalekangana, soni jwangajegamila cikamucisyo ca ŵandu.