Yosafata nangia bakindo Yuda agbarasi ga Bara bazomotumo na agu akpiahe naadu rogo gu ringara re. Ko aaida aboro ini ga Yekova andiko. Sidu, ko akedi abazogo na aboromotumo tipa i yugu ga Yekova andiko fu aboro rogo ringara Yuda dunduko.

Agu aringara naadu mbembedi anaagunde agunde ka sovura kuti Yuda mbiko i aima ino gupai nga Yekova adu kugii gako aboro. I aye na agamahe a fu Bakindo Yosafata. Ono tie, aMoabo, aAmono, gbiati agu aboro ringara nangia ga Seira yo aye ka sovura kuti Yuda. Yosafata aima ino gupai nga ko naida na ga Yekova undo. Sidu, ko adungura akumba, adee, na agude dunduko ku Yerusarema yo. Ko akpari ku barabangiriyo dunduko nga: ‘Yekova, zanga ro, ani arengbanga ka du na diabese te. Mo gumba gupai furani si aida ani mangihe.’

Yekova akaragapai kuti gu kparakpee re ki ya: ‘Ka oni gúndenga ya. Mi nika undo roni aundo. Oni ru rogo aba roni, na ki ru za, ka bi wai mi nika batasa roni.’ Wai gu Yekova abatasi yo?

Fuo girarago, Yosafata asia ababibia na ki gumba gupai fuyo nga, i naandu mbatayo fu asekere. I aguari Yerusarema yo ka ndu kuti ngba vura yo ku rogo gu ba nangia Tekua.

Wa ababibia aatambua Yekova na ngbarago na fugoyo kuari, Yekova asovura tipa gako aboro. Ko avundu ri aAmono yo na aMoabo i ki tona ka sovura dagbatiyo, na ka boro abatanga dagbayo ya. Ono Yekova abanda aboro Yuda, asekere, na aboromotumo. Agu aboro dunduko naadu rogo agu aringara naadu pati Yuda agi pa agu apai Yekova amangihe, na i aima ino gupai nga Yekova nasongoda gako aboro kindi. Wai gu Yekova abatasa gako aboro? Ngba dungu agene. Ko aidanga na undo be aboro tipa ka batasa gako aboro te.