Nyathi nyaku moko mir Israel ubino kwo i ng’om mi Cami, bor ku jupagi. Juaskari mi Cami uyake kud i bang’ jupagi, man i ng’eye, edoko boi pa dhaku pa Naman m’ubino jadit mi juaskari. Nyathi nyaku maeno ubed uworo Yehova kadok nwang’u dhanu m’ebekwo kugi giworo ngo Yehova de.

Naman ubino ku twoyo moko ma rac mandha m’unyayu rem i kume zoo man saa ceke nwang’u kume uberemo arema. Nyathi nyaku maeno umito lee dit nia ekony Naman. Pieno, egam eyero ni dhaku pa Naman kumae: ‘Ang’eyo ng’atu moko ma copo keyo kum won ot peri. I ng’om mir Israel, jabila pa Yehova moko nuti, nyinge tie Elica. Eromo keyo kum won ot peri.’

Min ot pa Naman unyutho ni Naman lembe ceke ma nyathi nyaku maeno uyero. Naman ubino ayika nitimo gin moko ci kara kume kei, pieno ecidho i bang’ Elica i ng’om mir Israel. Naman  ubino paru nia Elica biwok jole calu ng’atu moko ma pire tek. Ento kakare nibino weco i bang’e en gire, Elica uoro jatic pare re m’ubin umoth Naman man uwac ire kumae: ‘Cidh ijom wang’ abiro i kulo Yordan. E kumi bikei.’

Cwiny Naman ugam utur magwei. Eyero kumae: ‘Aparu nia jabila maeni birwo i bang’ Mungu pare man ebimulo kuma ci abikei. Re eyero nia acidh ajom i kulo maeni mir Israel. Watie ku kulo ma beco i Cami. Ka pi jom, nwang’u acopo jom kuca.’ Ng’ecwiny umaku Naman, e eai ku yo pa Elica.

I ng’eye, jutic pa Naman gikonye kara eyik paru pare. Giyero ire kumae: ‘Nyo icopo maru ngo nia itim lembe moko ci kara kumi kei? Lembe ma jabila ung’olo iri nia itim utie lembe ma yot. Ineno ngo nia ecibedo ber kan itimo ve m’eng’olo?’ Naman uwinjo lembe ma giyero ire. Egam eloro i kulo Yordan man ejom wang’ abiro. I wang’ mir abirone, kinde ma Naman uwok kud i pii, kume ukei man elony tetete. Ebino ku mutoro ma lee mandha, e edok i bang’ Elica pi nifoye. Naman uyero kumae: ‘Kawoni ang’eyo nia Yehova kende re ma tie Mungu mandha.’ Iparu nia nyathi nyaku ma Nyaisrael uwinjere nenedi kinde ma Naman udwogo ma kume ukei?