Hingongonda hiada hi Lôk Israel hi bé niñ i loñ Siria, haa ni lihaa jé. Ntôñ gwét u Siria won u bi bagal nye ni lihaa jé, a yila nkol u nwaa Naaman, ñane ntôñ gwét. Hingongonda hi bé bégés Yéhôva, to hala kiki bôt ipañ yé ba bé boñ bé nlélém.

Naaman a bééna béba kon i kôkô yé, a bé nok njôghe hiki ngéda. Hingongonda hi bé gwés toi hôla nye. Hi kal nwaa Naaman le: ‘Me nyi ngim mut i nla hôla nlô woñ. I loñ Israel, mpôdôl Yéhôva wada le Élisa a nla mélés nlô woñ.’

Nwaa Naaman a kal Naaman jam hingongonda hi bi añle nye. A bé bebee i boñ to kinje jam inyu mbôôp, jon a bi ke i Israel, i ndap Élisa. Naaman a bé hoñol le Élisa a ga leege nye kiki bañga mut. Ndi iloo le Élisa nyemede a kwélés Naaman, a om nkol wé i leege Naaman ni legel unu nwin: ‘Ke nogop ngélé isaambok ikété Lom Yordan. Ndi w’a mbôôp.’

 Hala a bi tééñga Naaman ngandak. A kal le: ‘Me hoñlak le mpôdôl nunu a ga sébél Nyambe wé inyu mélés me, a peghe ki moo mé i ngii yem. Ndi hanano, a nkal me le me kee me nogop i lom yap. Di gwé bañga balom i Siria. Inyuki me nla bé ke nogop nyoo?’ Naaman a bi unup, a nyodi ndap Élisa.

Bagwélél ba Naaman ba bi hôla nye i bana litehge lilam. Ba kal nye le: ‘Baa u gwé toi ngôñ i mbôôp? Ngo lini jam mpôdôl a mbat we le u boñ li yé jam li ntomb. Inyuki u mboñ bé jo?’ Naaman a nôgôl bo. A ke i Lom Yordan, a yube nyuu yé yosôna mukété ngélé isaambok. Mbus ngélé i nyônôs isaambok, Naaman a pam malép, a ma mbôôp. A bi kon maséé ngandak, a témb ni mbus i ti Élisa mayéga. Naaman a kal le: ‘Hanano, me nyi le Yéhôva nyen a yé bañga Nyambe.’ U nhoñol le kii hingongonda hi Lôk Israel hi bi nôgda ngéda Naaman a bi témb i mbai yé, a ma mbôôp?