Di luat Siria, adong sada borua na metmet na dao sian natua-tuana. Dibuat tentara ni Siria do ibana sian keluargana. Jala dibahen gabe hatoban di jabu ni sahalak panglima ni tentara na margoar si Naaman. Jahowa do na disomba dakdanak on, nang pe halak di humaliangna ndang manomba Jahowa.

Marsahit kusta ma si Naaman, jala mansai hansit do dihilala ibana. Lomo roha ni dakdanak on mangurupi si Naaman. Didok ma tu istri ni si Naaman, ‘Adong do na huboto na boi mambahen malum tuan i. Adong sada panurirang ni Jahowa di Israel na margoar si Elisa. Boi do dipamalum ibana tuan i.’

Dipaboa istri ni si Naaman ma i tu suamina. Dioloi si Naaman ma i. Laho ma ibana tu Israel tu jabu ni si Elisa. Dirimpu si Naaman, denggan do ibana sambuton ni si Elisa. Hape, holan pelayanna do disuru si Elisa mandok tu si Naaman, ‘Laho ma ho tu Sunge Jordan jala maridi ma ho sampe pitu hali. Malum do i.’

 Kecewa ma si Naaman. Didok ma, ‘Hurimpu do marhite goar ni Debata ahu pamalumonna jala dibahen tanganna tu ulungku. Hape maridi do ahu disuru tu sunge di Israel. Godang sunge na dumenggan di Siria. Boasa pola ingkon laho ahu tusi?’ Muruk ma si Naaman jala laho ma ibana sian jabu ni si Elisa.

Didokkon pangurupina ma tu si Naaman asa dioloi hata ni si Elisa. Didok nasida, ‘Ndang lomo roham naeng malum? Ndang maol i ulahononmu. Coba ma jo Tuan.’ Olo ma si Naaman. Laho ma nasida tu sunge Jordan jala maridi ma ibana sampe pitu hali. Dung maridi, pintor malum ma sahitna i. Mansai las ma rohana. Dung i, laho ma ibana mandok mauliate tu si Elisa. Didok ma, ‘Saonari huboto ma, Jahowa do Debata na sintong.’ Diboto ho do songon dia pangkilalaan ni borua na metmet i dung mulak si Naaman jala nunga malum?