Ro sup Siria, inai mkun Israel oso isya ḇyarek ḇinkwan ro kina ḇyesya. Sordade Siria suni bur kina ḇyesya, ma kirine ryo mananir sordade snori Naaman rum ḇyedi. Ḇye binfyan ḇe Naaman swari. Inai mkun ine isyom ḇe Yahwe, ḇape snonkaku ḇero ris ḇyesi oroḇa.

Naaman ismai dafduf pado. Ma dafduf ḇyenane dan ro kif ḇyenakam. Ro ras-ras iduf ker na. Inai mkun ani imarisen kaku fa ifnoḇek i. Inja ikofen ḇe Naaman swari, ’Yafawi mansei na ḇeḇuk pararei faro swambri. Ro Israel, Yahwe nabi ḇyedi oso isya snori Elisa. Iso na ḇeḇuk pararei ḇe swambri.’

Naaman swari ikofen ḇe Naaman rosai inai mkun ani ikofen ḇe i na. Snar Naaman imarisen ifrur sairirya monda fa iprei, inja ryamura ḇe Elisa rum ḇyedi ro Israel. Naaman doḇerada snar ima snonkaku ḇeba rirya inja Elisa na isaser i. Ḇape, Elisa isrow beri kuker Naaman i ḇa. Iwan manfamyan ḇyedi fa isaser  Naaman ma ḇyuk anun ine, ’Rwa ma wamasi ro Warḇeki Yordan rarwan rifik, ma nari waprei.’

Naaman fyafko kaku. Inja ikofen ḇo doḇe, ’Yoḇode nabi ine na dor Allah ḇyedi ḇo isawar dofen aya insama yaprei. Ḇesyaḇo iwan aya fa yamasi monda ro warḇeki ḇero Israel i. Warḇeki ḇero Siria napyum syadi. Sai ḇefnai iwan aya ḇa fa yamasi ro diwa monda?’ Naaman imsor ma ibur Elisa rum ḇyedi.

Naaman manfamyan ḇyesi sifnoḇek i fa kyara pyum. Sikofen ḇe i, ’Tuan woḇe na wafrur rosai monda insama waprei ḇae. Rosai nabi ani ikofen fa wafrur ya syamswen ḇa. Rosai ḇefnai fa wamewer wafrur na?’ Naaman iso anun sena. Rya ḇe Warḇeki Yordan ma pyanduk baken ḇyedi ḇe warya dori rarwan rifik. Ramnai, fyor isae ro warya dori iprei beri. Imarisen fafayaḇa, ma kyaḇer ḇe Elisa fa ikofen kasumasa. Naaman doḇe, ’Kirine yafawi Yahwe iso Allah ḇekaku dirya.’ Kakara bedi ido, moḇsa inai mkun ani ḇyaḇir rai fafisu myam Naaman iprei kwar?