Ọ ghaa mwẹ ọvbokhan okhuo ọkpa, ne ivbi iyokuo mu ke Izrẹl gha rrie Siria; ọ na do gha re ọguọmwadia ọvbokhan ọkaokuo ọkpa na tie ẹre Neaman. E Jehova ẹre ọvbokhan okhuo na ghaa ga, agharhemiẹn wẹẹ, emwa ni lẹga re ma gha ga e Jehova.

E Neaman na do gha khuọnmwi emianmwẹ nọ wegbe na tiẹre oti. Uwu obalọ ẹre ọ wa gha ye vbe ẹdẹgbegbe. Ọvbokhan okhuo nii na gha hoo nọ ru iyobọ nẹ. Ọ na tama ọvbokhan e Neaman wẹẹ: ‘I rẹn ọmwa nọ gha sẹtin mu ọdafẹn ruẹ egbe rran. Akhasẹ ọghe Jehova na tie ẹre Elaisia nọ rre otọ Izrẹl gha sẹtin mu ọdafẹn ruẹ egbe rran.’

Ọvbokhan e Neaman na ya tama ọdafẹn ọnrẹn emwi ne ọvbokhan okhuo nii khare. E Neaman na gele muegbe ne ọ ya bu Elaisia vbe otọ Izrẹl. Ọ na gha roro ẹre wẹẹ Elaisia gha mu ọghọ ye irẹn egbe. Sokpan e Neaman ke sẹ eke ne ọ ye, Elaisia na gie ọguọmwadia ọghẹe ya tama  rẹn wẹẹ: ‘Ya kpe egbe ruẹ vbe Ẹzẹ e Jọdan igba ihinrọn ne egbe mieke na rran ruẹ.’

Ẹi re ọna e Neaman te yaro yi. Ọ na kha wẹẹ: ‘I te wẹẹ te akhasẹ na khian wa rhie obọ yan mwẹ, ọ ghi tie eni Osa ọghẹe. I ma rẹn wẹẹ, te ọ khian wẹẹ ne I ya kpe egbe mwẹ vbe ẹzẹ nọ rre otọ Izrẹl, ẹi re ẹzẹ ne I khian na khuẹ ẹre I gualọ, ma mwẹ ẹzẹ nikhua vbe Siria.’ E Neaman keghi guọnmwẹ egbe kpa vbe owa Elaisia.

Eguọmwadia e Neaman keghi dia iziro ọghẹe. Iran na tama rẹn wẹẹ: ‘Ẹi re vbene egbe gha ya rran ruẹ, ẹre uwẹ gualọ? Emwi ne akhasẹ na, wẹẹ ne u ru i lọghọ. Wa ruẹ!’ E Neaman keghi ru vbene iran khare. Ọ na ya dinmwi egbe ẹre ye uwu Ẹzẹ e Jọdan vbe igba ihinrọn. Vbe ọ ghi ladian, egbe na rran rẹn. Ọ ma sẹtin ghọghọ, ẹre ọ na ghi ya kpọnmwẹ Elaisia. E Neaman keghi kha wẹẹ: ‘Eban ẹre I rẹnrẹn wẹẹ, e Jehova ọkpa ọre Osa ọghe ẹmwata.’ Vbe uwẹ a yayi wẹẹ, ọ ghaa ye ọvbokhan okhuo nii hẹ, vbe ẹghẹ ne Neaman ghi ya sẹ owa?