Didto sa Sirya, naay usa ka Israelinhon nga batang babaye. Layo kaayo siya sa iyang pamilya kay gidala siya sa mga sundalo sa Sirya. Nahimo siyang sulugoon sa asawa ni Naaman nga lider sa mga sundalo. Nagsimba siya kang Jehova, bisan pag ang mga tawo didto wala magsimba kang Jehova.

Nag-antos si Naaman tungod sa grabeng sakit sa panit. Gusto sa batang babaye nga tabangan si Naaman. Iyang giingnan ang asawa ni Naaman: ‘Duna koy nailhan nga makatabang sa imong bana. Naay propeta si Jehova sa Israel nga Eliseo ang ngalan. Iyang maayo ang imong bana.’

Gisultihan si Naaman sa iyang asawa bahin sa giingon sa batang babaye. Andam siya mohimog bisan unsa, busa miadto siya sa balay ni Eliseo sa Israel. Naghunahuna si Naaman nga hatagan siyag espesyal nga pagtagad ni Eliseo. Pero imbes sugaton siya, gisugo ni Eliseo ang iyang sulugoon nga maoy mosugat aron sultihan siya:  ‘Adto sa Suba sa Jordan ug kaligo didto ug pito ka beses aron maulian ka.’

Wala malipay si Naaman. Siya miingon: ‘Abi nakog ayohon ko niini nga propeta pinaagi sa pagsangpit sa iyang Diyos ug sa pagwarawara sa iyang kamot. Pero pakaligoon ko niya sa suba dinhi sa Israel. Mas maayo ang mga suba sa Sirya. Kon didto diay ko maligo?’ Suko kaayo si Naaman ug mipahawa siya.

Gikombinsir si Naaman sa iyang mga sulugoon. Sila miingon: ‘Di ba imong buhaton ang tanan aron maulian ka? Sunda na lang ang giingon sa propeta kay sayon ra man kaayo ang iyang gipahimo nimo.’ Gisunod ni Naaman ang ilang giingon. Miadto siya sa Suba sa Jordan ug milusbog sa tubig ug pito ka beses. Human sa ikapito nga paglusbog ni Naaman, naayo siya. Nalipay kaayo siya ug miadto kang Eliseo aron magpasalamat. Si Naaman miingon: ‘Karon nahibalo na ko nga si Jehova ang matuod nga Diyos.’ Unsa kahay gibati sa Israelinhon nga batang babaye dihang mipauli si Naaman nga naayo na?