Mu chifuchi cha Seria, mwapwile kanuke wa pwo Ka-Izalele yoze wapwile kusuku ni asoko jenyi. Kamukwachile kuli maswalale A-Seria, chocho yapwa ngamba wa pwo lia mwata wa tujita yoze te avuluka ngwo Naamane. Kanuke wacho te kakuwayila Yehova, chipwe ngwe atu waze apwile no te keshi kuchilinga.

Naamane kapwile ni musongo wa chikowa, musongo wacho wapwile ni kumupeleta mashimbu eswe. Kanuke yono kazangile chinji kumukwasa. Yalweza pwo lia Naamane ngwenyi: ‘Ngunanyingika mutu yoze mahasa kuwuka mukwenu-lunga. Mu Izalele, muli profeta wa Yehova yoze avuluka ngwo Elisha. Iye mahasa kuwuka mukwenu-lunga.’

Pwo lia Naamane yalweza mukwo-lunga yize amulwezele kuli kanuke. Iye te kanazange kulinga cheswacho hanga ahinduke, chocho yaya ku zuwo lia Elisha mu Izalele. Naamane yanyongo ngwe Elisha te mamutambula ngwe mutu munene. Alioze, sapu  aliwane nenyi, Elisha yatuma kavumbi kenyi hanga alitakane ni Naamane ni kumulweza ngwenyi: ‘Yako hanga ukasane yisuho shimbiali mu Lwiji Yordau. Mba mu musongo we muuhwa.’

Naamane yahonga chinji. Iye yamba ngwenyi: ‘Yami te ngunanyongo ngwami profeta manguwuka ha kutambika Zambi yenyi ni kungupalikisa moko jenyi. Alioze, kanangutumu hanga nguye ku lwiji wo mu Izalele. Yetu tukwete ngiji jipema mu Seria. Mumu liaka kangutumine ko?’ Naamane yevwa uli unji, chocho yaputuka kuya.

Tuvumbi twa Naamane yamukwasa hanga apwe ni nyonga lialita. Ayo yamwamba ngwo: ‘Mwata ena ngwami unafupa kulinga cheswacho hanga uhinduke nyi? Chuma chize profeta akutuma kulinga chili chashi. Mumu liaka kuwazangile kuchilinga? Naamane yaapanjika. Yaya ku Lwiji Yordau, yanjila kajiwa mu meya yisuho shimbiali. Ha chisuho chamuchishimbiali, Naamane yatuhuka mu meya ni mujimba upema. Yawahilila chinji, chocho yafuna hanga asakwilile Elisha. Naamane yamba ngwenyi: ‘Haliapwila mba hinanyingika ngwami, Yehova iye Zambi wamwenemwene.’ Kunyonga lie, kuchi kanuke yono Ka-Izalele evwile muze Naamane ahindukile ku musongo wenyi?